UPSR di Sarawak tetap dipejalaika

Laban bacha IPU enda manggai 300, peresa nya deka diteruska: Dr Azhar

KUCHING: Semua nembiak sekula ke ngambi peresa UPSR di Sarawak deka nyambung napi peresa UPSR sida seharitu.

Enti bacha IPU manggai 300, opis pelajar deka berunding ngaga pemutus ngelanjarka peresa UPSR ngagai Opis Menteri Pelajar.

Dr Azhar Ahmad

Direktor Opis Pelajar Nengeri

Direktor Opis Pelajar Nengeri Dr Azhar Ahmad madahka bacha Indek Pengamah Angin (IPU) enda manggai 300, peresa nya deka diteruska.

“Enti bacha IPU manggai 300, opis pelajar deka berunding ngaga pemutus ngelanjarka peresa UPSR ngagai Opis Menteri Pelajar,” ku iya madah ngagai The Borneo Post lebuh ke dikerandau kemari.

Bacha IPU ba kualiti angin ti beresi iya nya ari 0 ngagai 50, 51 ngagai 100 jelan pemeresi, 101 ngagai 200 kamah, 201 ngagai 300 kelalu kamah enggau ngelui 300 ngeruga pengerai.

Bisi 40,448 iku nembiak sekula bisi ngambi peresa UPSR di Sarawak, ke berengkah Hari Tiga minggu siti nyin tadi lalu deka berengkah baru seharitu ba subjek Matematik.

Dr Azhar nyemetak madah, Opis Pelajar Nengeri udah meri 69,000 iti sengkabung mua ngagai 713 buah sekula di Kuching, Samarahan, Sri Aman, Betong, Sarikei, Mukah enggau Sibu laban kandang menua nya ke balat napi sebun asap.

“Kami fokus ngagai bala nembiak sekula ke ngambi peresa UPSR ba kandang menua ke bisi penanggul IPU ngelui 200.”

Iya mega madahka opis menteri nya udah ngerah semua opis pelajar pelilih menua (PPD) enggau sekula ngambika nitih atur prosedur operasyen standard (SOP) enggau surat tesau sentang gaya sebun asap ti nuntung nengeri tu.

“Nitihka atur semua sekula ke napi penanggul sebun asap enggau bacha IPU ngelui ari 200 patut ditutup.”

Taja pia, iya madahka pemutus tdeka nutup sekula diberi ngagai prinsipal enggau kepala pengajar sekula bepelasarka bacha IPU ke baru pukul 6 lemai kemari.

“Sida deka madah ngagai PPD enggau Opis Pelajar Nengeri bekaul pemutus tu ninting hari.”

Berebak enggau nya, Opis Pelajar Nengeri nengah siti penerang madah apai indai ti beratka pengerai anak sida dikemendarka ngasuh bala anak sida enda nurun ke sekula sekumbang bisi penanggul sebun asap tu.

“Taja pia, sekula patut nemu sereta dipadah kebuah bala anak sida enda nurun ke sekula,” ku iya madah lebuh ke macha surat tesau ti dikeluarka Opis Menteri Pelajar dikena nentuka pengelikun enggau pengerai bala nembiak sekula ke bisi napi penanggul sebun ke balat.

Iya mega ngelalau bala nembiak sekula ngambika bekenaka sengkabung mua enggau ngirup mayuh agi ai lebuh napi penanggul besebun tu.

Nitihka bacha IPU urung jam pukul lemai, kualiti pengamah angin di Sri Aman enggau Kuching mandangka ba tikas ti ngeruga pengerai enggau bacha IPU 248 enggau 241.

Empat palan stesyen Opis Rampa Menua ngerikodka bacha balat kamah enggau bacha IPU ba Samarahan (191), Sarikei (142), Sibu (119) enggau ILP Miri (105).

Ba rikod positif, Opis Metrologi Malaysia (MET) nyadang sekeda kandang endur di nengeri tu nyengkaum Kuching enggau Sri Aman deka ujan muak ke pagi enggau malam.

— Gambar Muhammad Rais Sanusi ENDA NGETU: Bala pengereja pengawa ngena sengkabung mua benung bejalaika pengawa sida bekebun di Petra Jaya.

— Gambar Muhammad Rais Sanusi TETAP GAWA: Siku orang mai perau tambang mai bala orang ke numpang iya meraka Sungai Sarawak taja pan sebun asap ke tebal nyadi di mengeri Kuching.

— Gambar Muhammad Rais Sanusi ANGIN BALAT KAMAH: Siku orang ke nepan mutosikal ngena sengkabung mua nyeliahka ari tesintak ke angin ti kamah ba Jalai Padungan.