Yeo: Sebun asap diatu dipelaba badu nyadi ujung bulan September
KUCHING: Sebun asap ti benung nuntung nengeri Sarawak enggau sekeda nengeri di Malaysia diatu dipelabaka badu nyadi ba ujung bulan September ketegal ubah monsun.
Menteri Kuasa, Sains, Teknologi, Rampa Menua enggau Ubah Gaya Hari (MESTECC) Yeo Bee Yin nengah penerang dalam Facebook iya kemari madahka sebun ke nuntung menua kelebih agi Sarawak nyadi ketegal ari sekeda aktiviti nunu di Kalimantan enggau Sumatera Indonesia.
“Ejensi Mutar Penusah Ngenyit Penusah Menua (NADMA) bekerejasama enggau MESTECC nengah (MetMalaysia) sereta TUDM (Soldadu Langit Diraja Malaysia) deka ngaga sekeda pengawa ‘nerenak remang’ pengudah gaya ke manah iya nya penyampau remang ke chukup dikena mutarka sementara gaya ba kandang endur ke balat napi nya.
“Taja pia, penusah angus di Indonesia patut dirara dikena mutarka pun nyadi sebun asap tu (di Malaysia) enti enda penanggul sebun asap tu nyadi baru pengudah hari ujan,” ku iya.
Berindik enggau nya Indonesia patut lengkas ngerara penusah angus ke nyadi di menua nya lalu perintah Malaysia sedia mantu ngerara api di Kalimantan enggau di Sumatera.
Perintah Malaysia mega ku iya deka ngena semua jalai diplomatik dikena minta perintah Indonesia ngiga chara lengkas mutarka penanggul sebun asap nya.
“MESTECC bekerjasama enggau Opis Menteri Luar Nengeri nganjung sekeda surat diplomatik ngagai perinah Indonesia minta lengkas ngerara pengawa nunu di menua nya.
“Duta Malaysia ke Indonesia disadang betemu enggau perintah Indonesia kena Hari Satu. Sida mega deka ngatur siti kangau telefon ke aku berandau enggau menteri ke mangku pengawa nya dikena nandu pematut atur nya dipejalaika enggau lengkas,” ku Yeo.
Nitih ku iya, perintah udah mai isu sebun asap ke meraka garis entara menua lebuh ‘Kumpulan Kerja Teknikal’ (TWG) ke-21 enggau Komiti Pemandu Menteri Kandang Menua Mit (MSC) pun bulan Ogos tu tadi.
Iya madah aum nya deka digulu pengari ari menua Brunei Darussalam, Indonesia, Singapura enggau Thailand.
Pemutus aum nya siti jaku setuju ti dijapai dikena matau lalu ngangkatka sekeda chara dikena nyeliah lalu ngurangka sebun asap meraka garis entara menua lebuh musin kemarau ke benung nyadi diatu (Ogos nyentuk Oktober), ku iya nambah.
“Tang, semina sebedau udah nya(aum nya) gaya nunu enggau tebuka di Indonesia majak balat nyadi,” ku iya.
Berindik enggau nya Yoe nangkan mensia mayuh ngambika nitih pemansang ke baru penusah sebun asap di nengeri tu kelebih agi bacha Indek Pengamah Angin (IPU) enggau meda ba website Opis Rampa Menua (JAS) iya nya apims.doe.gov.my.
Mensia mayuh mega tau muka websita asmc. asean.org dikena nemu gaya enggau status ke baru titik angat, tuju ribut bepuput enggau ujan di kandang menua Asean.