UNIFOR begunaka timbal sentang prestasi unit nya, ku Uggah
KUCHING: Sapit Kepala Menteri, Datuk Amar Douglas Uggah Embas minta gerempung jalai pengarap enggau rumah sembiang beratika prestasi Unit Pekara Jalai Pengarap Bukai (UNIFOR) naka ke diatu.
Uggah ke mega Menteri Ke Mangku Tanggungpengawa ba UNIFOR madah, pengawa beratika prestasi nya ulih nyaup ke baru unit tiga taun ditumbuhka nya ngemanahka servis sida ngagai jalai pengarap bukai.
“Objektif UNIFOR iya nya ngaga pengawa enggau naka pemanah ngagai kita tang kami begunaka timbal ngambika UNIFOR ulih nyingkang ke mua.
“Kami engka enda ulih mutarka sekeda isu nengah chara ke pemadu manah nya alai kami begunaka timbal ari kita dikena kami ngemanahka UNIFOR,” ku iya.
Iya bejaku nya ba Biennial Diocesan Synod Ke-29 enggau Pengerami Makai Lemai Pengasih Ngulihka Belanja ungkup projek House of Epiphany (HOE) ari baruh pegai Bishop Kuching ungkup gerija Anglikan Kuching ditu ensanus.
Ku Uggah baru, Perintah nengeri udah ngungkupka RM15 juta ngagai UNIFOR dalam taun 2017 lalu RM20 juta ungkup taun 2018.
Taun tu ku iya, perintah negeri ngungkupka RM30 juta ngagai UNIFOR enda n yengkaum RM27.5 juta geran projek rayat ari Kepala Menteri dikena mantu mayuh bengkah gerempung ukai Islam di nengeri tu.
Ba pengerami nya, Uggah ke mega Menteri Betanam Betupi Moden, Tanah Adat enggau Pemansang Kandang Menua ngansak gerija Anglikan ngaul diri ba Program Transformasyen Betanam Betupi Sarawak.
Program transformasyen betanam betupi nya ku Uggah, dikena munaska penyeranta kelebih agi di menua pesisir lalu ke tebal agi sida nya kaban gerija.
“Perintah Sarawak udah minta kitai nentuka Sarawak nyadi pemansut mendam produk pemakai nyerumba taun 2030 lalu siti ari program ti diperansanyang Kepala Menteri iya nya sistem fertigasyen.
“Di Sarawak kitai bisi 40 parish gerija, nya alai aku deka ke tetiap parish nyendiaka projek fertigasyen nyadi model ungkup parish sida.
“Nama utai ke deka ditanam nya pulai ngagai kita lalu aku deka nganjung raban teknikal mantu ngemansangka sistem fertigasyen tu,” ku iya.
Bejaku sentang Projek HOE, Uggah madahka Perintah Sarawak udah ngemendarka ungkup belanja RM7 juta dikena ngaga HOE.
Sgi bisi laluh RM3.5 juta ke diguna ku iya, deka dipejalaika begulai entara perintah enggau gerija empu.
“Aku enggau Sekretari Peintah Sarawak Datu Jaul Samion sereta bala pengari rayat ke bukai deka ngumpul RM1.5 juta lalu kita ngumpul RM2 juta di kena ngenyukupka duit turu RM10.5 juta ke diguna ba projek HOE,” ku iya.
Ba pengerami nya, Uggah mega ngungkupka belanja RM400,000 ngagai Gerija St Thomas Kuching dikena ngatur aktiviti taun baru ti nyadika penambah ngagai RM100,000 ke udah dikemendarka sebedau tu.
Projek HOE nya pengawa ngaga begunan baru ke mungkur merangkumi bilik licha, bilik seminar, gerija mit, muzium, librari enggau buding ke guna semua.
Sama bisi datai, Bishop Gerija Anglikan Sarawak enggau Brunei, Reverend Danald Jute, Bishop Besai Gerija Roman Katolik Kuching, Simon Poh enggau ke bukai.