Pemujur KTBKS sekali agi ngangkatka nama Sarawak
SIBU: Kelab Taekwondo Bumi Kenyalang Sibu (KTBKS) sekali agi ngangkatka nama nengeri Sarawak sepengudah mujur mai pulai sepula iti emas enggau lima midul pirak ba ‘Kejuaraan Piala Heros Taekwondo 2019’ di Stadium Chinwoo, Kuala Lumpur, empai lama.
Midul emas mujur dibai Ellis Wong Siew Yi, Aaron Moh Nieng Yan, Dyllen Chieng Neng Yuan, Richard Ling Chung Ying, Joseph Wong Shou Ho, Vanisia Moh Mei Yiing, Elton Lau Hao You, Qistina Siti Aloyah Mohd Fadly enggau Lau Chuang Dee.
Midul perak dibai Clarence Chii Kouk Huan, Wong Siew Lok, Leonardo Lau Hal Chen, Tommy Hii Qi Hong enggau Dyllen Chieng Neng Yuan.
Pekit renggat keempat ke diatur Kelab Taekwondo Heros digulu urung 1,800 atlet ari menua China, Singapura, Hong Kong, Indonesia, Taiwan, Thailand, Myanmar, Laos, Brunei enggau India.
Mandal Presiden Gerempung Taekwondo Nengeri Sarawak (PTNS) Dato Sri Lau Keung Chai madahka iya berasai temegah ari meda pemujur atlet tu.
Iya ti mega penyanding penemu KTBKS madah, semua raban gerempung taekwondo meseti nitihka atur ti patut baik nya pekit digaga ba menua tu tauka menua tasik.
“Semua raban tau minta lalau enggau pemendar ari Chairman Teknikal Nengeri PTNS Master Tan Check Joon.
“Kelimpah ari nya sida mega meseti minta pemendar ari Taekwondo Malaysia (TM) enggau PTNS,” pia ku iya.
Iya mantaika jaku nya maya Pengerami Makai Lemai dikena nyelamat pemujur atlet ba sebuah restoran ditu, empai lama.
Lau mega madah, atlet KTBKS udah datai ba tikas ke nyulut nengah pemujur ti diayanka sida.
“Kitai deka ngemeratka agi pekit tikas antarabansa ngambika ulih ngangkatka ati pengelandik atlet dudi hari,” ku iya madah. MERADONG: Pengawa ngenyinakka diri nanam rian Musang King enggau Duri Hitam kenyau ari lima taun ke udah, nyata meri pemaik ngagai Theng Nam Hoi.
Tetiap datai ba maya musin buah, rian Musang King enggau Duri Hitam ke ditanam iya bisi peminta ke chukup manah ari bala bakih iya.
Ku iya, kekadang enda tegalauka sida buah nya ketegal peminta enggau makit ke chukup manah.
“Nanam rian tu ulih meri penguntung ke manah laban rega Musang King tinggi iya nya urung RM60 sekilogram lalu Duri Hitam RM70 sekilogram lalu nya mih rega di Sarawak.
“Aku pechaya di Semenanjung rega buah tu mar agi,” ku iya lebuh ke nerima penemuai ari bala ketuai raban bansa di kebun iya bedau lama udah.
Balat ngemegahka, peranak asal Bintangor tu mega nyadi Kaban Gerempung Peladang Kandang Menua (PPK) Meradong ti keterubah mujur nanam rian tu ke alai naka ke diatu bisi 500 pun rian Musang King enggau 40 pun rian Duri Hitam ba tanah pemesai 10 hektar.
Ukai nya aja, Theng mega enda lukek enggau penemu sereta teknik tauka chara nanama kededua asil utai tanam nya.
“Saya seruran ngelaluka penatai bala temuai nyema sida deka belajarka teknik nanam Musang King enggau Duri Hitam.
“Saya seruran sedia bekunsi peneleba ke dikemisi dikena nempa mayuh agi orang nanam raja buah tu,” ku iya.
Ba Theng, iya mega seruran diberi lalau ari PPK Meradong sentang chara ngaduka dokumentari, maja enggau ke bukai.
Ba pengawa maja, iya madahka diri ngena baja ai K Biobooster ti dipadahka PPK Meradong ngagai iya ngelama tu, nyata meri empas ke manah ti ngasuh bebuah lebat.
Bedau lama udah, iya bisi nerima penemuai ari Tuai Rumah Aliaa Bon enggau Tuai Libau Klumbu ari Batu Niah, Miri ke nemuai kia seraya belajarka chara ngawin enggau ngempat.
Tuai Rumah Libau, madahka diri rindu ati meda pengawa nanam rian kelebih agi Musang King ti ditanam dia.
Iya ngembuan juluk deka nanam rian Musang King ba tanah pemesai 15 hektar udah tu ila.
Sama bisi datai maya nya Menijar Besai Gerempung Peladang Kandang Menua Meradong disempulang Sapit Menijar PPK Meradong enggau menijar pengatur projek PPK Meradong.