Kelab Badminton Beat Team Bintangor mujur Pekit Badminton Tertutup Bandar Bintangor 2019

BINTANGOR: Beserimbai enggau Hari Kebangsaan, Kelab Badminton Beat Team Bintangor udah ngatur Pekit Badminton Tetutup Bandar Bintangor 2019, empai lama.

Pemujur pekit tu disaup Menteri Muda Korporat ti mega Kaban Kunsil Nengeri (ADUN) Semop Abdullah Saidol.

Ba pekit tu, Kategori Beregu Lelaki mandangka Rusdy Che Mak enggau Umpang See megai gelar champion lalu ditangkan Fendy enggau Abg Nazaruddin Abg Noh.

Penuduk lumur tiga begulai diempu tim Mohammad Shanon enggau Syed Muhd. Khairi enggau tim Syed Khairi Hakimi.

Ba Kategori Beregu Indu, gelar champion diempu Anissuriana Sulaiman enggau Ling Eng lalu penuduk lumur dua diempu Magdeline Lukom enggau Rohana.

Tim Dayang Habsah enggau Irene Tie enggau tim Carmen Ung enggau Hassinah Mahmud bela ngempu penuduk lumur tiga begulai.

Chairman komiti pengatur Alim Johan madah, batang tuju pekit iya nya nyintal kaul ba bala raban enggau mensia mayuh ke bukai.

“Ari pekit tu mega kitai ngarapka ulih negapka agi pengering ati diri sereta nempa modal mensia seririh enggau pemansang menua,” pia ku iya madah.