Jematan Nanga Lassa ‘emas’ ngagai peranak di Daro
MUKAH: Jematan Nanga Lassa ke disadang tembu ba taun 2023 nya jematan ‘emas’ ngagai peranak Daro enggau ke ngelingi nya.
Kepala Menteri Datuk Patinggi Abang Johari Tun Abang Openg madah, penembu jematan nya ila ukai semina ulih ngambung jalai besai ungkup menua pesisir tang dipelaba deka nyadi penyambung besai bekal ai di menua pesisir.
“Siti rentayan pemansang (Jematan Nanga Lassa tembu) deka meri empas besai ngagai sosioekonomi semua kandang menua ditu ila, ku iya ba aum media Pengerami Nasih Tanah Jematan Nanga Lassa, Daro ditu ensanus.
Ku iya, dalam timpuh lima taun pengudah jalai pesisir Tanjung Manis enggau Daro, palan besai grid bekal ai timpuh panjai deka disambung nengah jematan nyengkaum Jematan Nanga Lassa.
“Tu chara ngelimat laban kitai enda agi ngena baruh tasik enggau sungai nyambung grid bekal ai,” ku iya agi.
Penanggul ke suah nuntung bekenaka ai tasik enggau sungai nya beungkus tinggi enggau paip iya ke meruan kekasak.
Abang Johari ba jaku pengelalu bejadika pengerami nya mega madah, perintah Sarawak ngungkupka belanja RM11 bilion dikena ngaga jalai pesisir di Sarawak.
Tu dikeamat ukai siti lumur ke mimit tang iya patut digaga ungkup rayat kelebih agi di menua pesisir.
Iya madahka penau perintah ngaga jalai pesisir, ai, elekterik sereta pemansang ke bukai nya laban penegap politik di nengeri tu.
Nya kebuah, pengandal rayat Sarawak ngagai penau orang Sarawak empu megai enggau merintah nengeri tu beguna amat.
Nambahka nya, jematan di serata Sarawak digaga perintah nengeri nadai bebayarka tol ke alai bebida di Semenanjung Malaysia.
Bisi mega bejaku iya nya Kaban Kunsil Nengeri (ADUN) Daro Safiee Ahmad, Menteri Muda Jalai Pesisir Datuk Julaihi Narawi enggau Sapit Kepala Menteri Tan Sri Datuk Amar James Jemut Masing.