Kunsilor, pemesai MBKS dipinta mandangka lumur telefon ba notis pasar, palan bedaja ke ari baruh jaga sida
KUCHING: Semua kunsilor nyengkaum pemesai Majlis Bandaraya Kuching Selatan (MBKS) ke bisi tanggungpengawa dipinta mandangka lumur telefon ba notis pasar enggau palan bedaja kandang endur ke ari baruh jaga sida.
Datuk Bandar MBKS, Dato Wee Hong Seng, atur nya dipejalai ngambika mensia mayuh nyamai agi ngaga ripot ngagai opis bekuasa kandang menua nya.
Ku iya, bisi enam pasar enggau semilan palan bedaja ari baruh kuasa pegai MBKS.
“Aku deka sida mantaika lumur sida ba papan notis dalam timpuh kediatu lalu ungkup keterubah, kitai deka ngeletakka lumur sida nyengkaum aku empu ngena poster ba papan notis enam iti pasar kandang endur MBKS abis nadai dalam minggu tu.
“Entara nya baka Pasar Komuniti Sutong, Pasar Petanak, Pasar Kenyalang Park, Pasar Sungai Apong, Pasar Basah Bintawa enggau Pasar Jalai Foochow,” ku iya lebuh dikerandau pemberita pengudah nemuai ngagai Pasar Komunti Stutong ditu, kemari.
Wee nambah, nya sebengkah juluk pengawa sida deka meri servis ke pemadu manah ngagai mensia mayuh.
“Kelimpah ngemudahka mensia mayuh ngiga penerang tauka ripot sida mega ulih ngeripot pemesai tauka kunsilor nyengkaum aku empu ke enda bejalaika tanggungpengawa enggau manah nengah chara betelefon ngagai lumur ke dipandang ba papan notis nya,” ku iya.
Bejaku sentang penemuai nya, iya puas ati enggau gaya sereta perengkaguna ke bisi ba pasar komuniti nya.
Terang iya, Pasar Komuniti Stutong entara sebengkah kandang endur ba baruh MBKS ke suah dipuji exDatuk Bandar sebedau tu iya nya Dato James Chan, nya alai kitai deka neruska agi legasi penyulut tu.
Kitai ditu meri servis ngagai rayat, nya alai kitai patut bejalaika tanggungpengawa ngenyemakka diri enggau sida ngambika nemu semua penerang ke diguna dalam juluk kitai deka meri servis ti pemadu manah,” pia ku Wee seraya andal deka mutarka ripot enggau penanggul ke diterima MBKS.
Ku iya, opis iya bebendar deka mantu orang bedaja baka di Pasar Komuniti Stutong ngambika terus meransang penatai pemisi lalu ulih besemekih enggau bala pedaja ke bukai.
Berebak enggau nya, iya madah deka numbuhka undang-undang bekaul agu dikena nyaga pemeresi ukai semina ba agu mensia mayuh tang ba kedai kopi mega.
“Aku ngarap nengah pengawa tu, tikas pemeresi agu endur kitai (MBKS) mayuh agi bulih gred A laban diatu agu kitai ukai ba kategori A tang mega B,” ku iya.