Semua kandang menua di Pelilih Sri Aman deka napi penanggul bekal ai
SRI AMAN: Semua Kandang menua di Pelilih Menua di Sri Aman deka napi penanggul bekal ai enggau kesuh ai baruh ketegal tikas ai Sungai Batang Undup Bayai ke majak langkang lalu udah ba tikas bejejaga laban gaya hari rangkai sereta angat.
Opis Bekal Ai Menua Pesisir (JBALB) Bagi Menua Sri Aman ba siti penerang madah, Opis JBALB Bagi Menua Sri Aman udah nyendiaka ‘Centralized Water Collection Centre’ ba lima kandang menua di Sri Aman iya nya ba mua Opis JKR Sri Aman, Flat Perintah Nengeri Jalai Kedang, ba mua Jil Sri Aman, Kampung Pakit enggau Pasar Lachau, Pantu.
“Mensia mayuh ke napi penanggul bekal ai tu tau ngambi ai ba lima kandang menua nya.
“Opis kami mega deka nganjung ai ngena lori tangki ngagai palan ke balat napi penanggul tu,” ku penerang nya madah.
“Opis kami minta kerejasama ari mensia mayuh ngambika bejejimat bekenaka ai sekumbang timpuh penanggul bekal ai tu,” pia ku penerang nya.
Tambah penerang nya baru, semua penerang ke diatu deka dipadah nengah laman Facebook rasmi JBALB Sarawak.
“Ripot enggau tanya tau dikenataika ngagai Careline JBALB Sri Aman ba lumur 083-323240/323242,” terang penerang nya.