‘Program Jualan Amal 2019’ PPDK mujur matak penatai 200 iku
KUCHING: ‘Program Jualan Amal 2019’ 2019 ke diatur Gerempung Nyaga Dalam Komuniti (PPDK) Bestari Siburan ditu udah mujur matak penatai 200 iku mensia mayuh.
Tuju program tu diatur dikena ngumpul duit turu dikena melanja aktiviti opis pengatur pengawa PPDK Bestari Siburan kelimpah ngerapitka kaul enggau pangan diri dalam komuniti di negeri tu.
Program ‘Jualan Amal’ ke diatur di Dewan Siburan kena 8 September tu tadi, dipenyadi Menteri Muda Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit, Datuk Francis Harden Hollis.
Francis ba jaku pengelalu iya madah program bansa tu manah amat laban nya ulih nyaup Gerempung Ukai Dikuasa Perintah (NGO) PPDK Bestari Siburan dalam mantu bala sida ke kurang benasit.
“Ari ngatur program tu, mensia mayuh bepeluang ngenataika bantu ngagai gerempung tu nengah bebelika barang ke dijual ti nyadi sebengkah ari ulah rayat Malaysia.
“Kebuah tu, laban sekeda ari asil ke dijual deka diberi ngagai PPDK Siburan Bestari,” ku iya.
Berebak enggau nya, iya ngelanggur ngambika sida pengatur pengawa ngemanahka agi program nya dudi hari ila.
Entara siti nya ku iya, ngiga mayuh agi bala pesereta bejual ngambika bedagangka produk sida nengah nyewa lot bansal ke diberi.
Iya mega madah Perintah Gabungan Parti Sarawak (GPS) seruran beberatka dalam nangkup ke guna komuniti ngambika pengelantang komuniti nyengkaum palan nyaga OKU di serata nengeri dijaga.
Ba pengerami nya, Francis ke mega Kaban Kunsil Nengeri (ADUN) Simanggang bisi ngungkupka bantu Projek Mit Menua Pesisir (MRP) iya ba taun 2020 sepenyampau RM5,000 ngagai PPDK Siburan Bestari dikena ke pengatur pengawa ngatur aktiviti ti deka dipejalaika.
Urung 19 palan bedaja disediaka maya program nya ke diatur pengelama sehari nya.
Bela datai sama iya nya Chairman Pengatur Pengawa, Lomas William Aten; Pemesai Pengereja Pengawa, Opis Pelilih Mit Siburan, Ranum Bari; Ketuai Raban Bansa Bagi Menua Kuching, Temenggong Austin Dimin, Chairman Komiti Pengatur Pengawa, Lomas William Aten enggau bala temuai dipebasa ke bukai.