KM: Gabungan Parti Sarawak ulih bediri kediri empu

Sebedau nyerara diri ari BN Sarawak bepanggai ba Putrajaya kelebih ari ari sukut pemansang nengeri

Utusan Borneo (Sarawak) - - Berita Iban -

KUCHING: Sarawak ari baruh iring perintah Gabungan Parti Sarawak (GPS) ngaga pemutus berani nyerara diri ari Barisan Nasional (BN) ti udah 56 taun nyadi ‘tungkat’ nengeri tu.

Kepala Menteri Datuk Patinggi Abang Johari Tun Openg madah, Sarawak dalam timpuh nya bepanggai ba BN di Putrajaya kelebih ari ari sukut pemansang nengeri.

“Diatu, kitai enda agi bepanggai ba sida (BN) sereta patut bediri ba kaki diri empu.

“Aku pechaya kitai ulih ngereja kediri empu kelebih agi Sarawak mayuh pemansut, tang suntuk mensia ke landik.

“Lebuh kitai bisi pengelandi­k tu enggau nemu hak kitai, aku ngasaika kitai deka nyadi lebih manah ari Semenanjun­g Malaysia,” ku iya.

Iya mansutka pekara nya lebuh bejaku ba pengerami Nyiri Kaban Komiti Gempung Serakup China Sarawak dalam timpuh 2019-2022 ba sebuah hotel ditu, malam Hari Dua tu tadi.

Berindik ari pekara nya iya minta semua bansa ngambika beserakup awakka Sarawak bisi polisi ti lebih manah jemah ila enggau nyadika pelajar nya kunchi besai.

“Sarawak untung laban bisi pemansut ti diguna dikena nyadi sebuah nengeri ti mansang.

“Kitai semina patut fokus tauka numpu ngagai pemansang nengeri ngambika kitai ulih nyadi kunchi pemansang di Malaysia,” ku iya.

Nitihku iya, GPS bisi perambu ke diri empu dikena ngemansang­ka nengeri tu ti mungkur semua.

“Nya alai, kitai amat ngelaluka penyerata amyuh komuniti enggau sektor dagang awakka Sarawak nyadi nengeri pemadu maju kelebih agi manggai ba taun 2030,” ku iya.

Bejaku baru ku iya, chara dikena negika hak di baruh Konsititus­yen enggau Sempekat Malaysia 1963 (MA63), kitai numbuhka beberapa polisi.

“Siti ari nya baka numbuhka chukai nyual minyak enggau gis Sarawak sepenyampa­u lima peratus.

“Aku numbuhka chukai tu iya nya nitihka undang-undang ti nyadi penambah ngagai penatai pemisi Sarawak.

“Ambika chunto, lebuh PETRONAS beoperasye­n ba Kanada, sida iya bepelasark­a undang-undang menua nya, enggau lebuh beoperasye­n di Sarawak , sida mega patut bebasaka undang-undang kitai,” ku iya.

Nengah duit tambah nya, ku iya, nya deka meri awak ngagai Perintah Sarawak bejalaika pemansang di nengeri tu nyengkaum meri geran ngagai sekula China.

Ba pengerami nya, Abang Johari mega meri jamin deka bebendar ngiga tanah dikena ngaga tauka nirika begunan Gempung Serakup China Sarawak ditu.

Sama bisi datai, Menteri Utiliti Dato Sri Dr Stephen Rundi Utom, Menteri Kaunsil Kandang Menua enggau Pengawa Berumah Datuk Dr Sim Kui Hian, Presiden Gempung Serakup China Sarawak Datuk Richard Wee enggau ke bukai.

Aku pechaya kitai ulih ngereja kediri empu kelebih agi Sarawak mayuh pemansut, tang suntuk mensia ke landik.

Datuk Patinggi Abang Johari Tun Openg

Kepala Menteri

— Gambar Tan Siong Wei

TERIMA MIH: Abang Johari nyerahka Surat Chiri ngagai Richar ti nyadi Presiden Gempung Serakup China Sarawak baru ungkup timpuh 2019-2022 di Kuching, malam Hari Dua.

Newspapers in Malay

Newspapers from Malaysia

© PressReader. All rights reserved.