Pejalaika R&D, asilka teknologi baru ti beratka asal rampa menua

Utusan Borneo (Sarawak) - - Berita Iban - Dikarang Rengenyan Labang

KUCHING: Kepala Menteri Datuk Patinggi Abang Johari Tun Openg meri perambu ngambika pengawa mansik enggau ngemansang (R&D) ngasilka teknologi baru dikena ngasilka bateri ti ngemeratka pengasal rampa menua.

Berindik ari pekara nya iya minta Amalgamate­d Batteries Manufactur­ing (Sarawak) Sdn Bhd enggau Jujiang Power Technology Co. LTD (China) bejalaika R&D pasal ngasilka teknologi baru nya.

Iya madahka pengaga ati diri ngagai kerejasama tauka kereja kunsi entara Amalgamate­d Batteries Manufactur­ing (ABM) enggau Jujiang Power Technology ti deka matau enggau nyendiaka bateri elektrrik ungkup makit domestik enggau antarabans­a.

“Kerejasama tauka kereja kunsi entara Jujiang Power technology enggau ABM udah tentu deka ngemansang­ka teknologi baru bekaul enggau ngasilka bateri enggau pengenan bateri.

“Mayuh menua diatu ngena kerita elekterik hibrid, reti iya peminta ba bateri tu deka nambah lalu serata dunya bejakuka pasal rampa menua.

“Aku arap bendar ABM enggau Jujiang Power Techonolog­y deka bejalaika R&D, keterubah, iya nya bakani ngasilka bateri ke ulih dikena baru,ngelama tu bateri ulih tan dalam lima taun,” ku iya.

Abang Johari mansutka pekara nya mya iya nyadi saksi pengawa nyain sempekat pemereti ati (MoU) entara Amalgamate­d Batteries Manufactur­ing (Sarawak) Sdn Bhd enggau Jujiang Power Technology Co. LTD (China) ti diatur ba sebuah hotel ditu, kemari.

Berebak enggau tu Abang Johari madahka mayuh pemeranak puku ari China deka datai ke Malaysia kelebih agi ke Sarawak tu berindik ari gaya politik ba nengeri tu ti tegap.

“Mayuh pemeranak puku datai ke sarawak, sida pechaya ngagai penegap ti dikembuan Sarawak nya kebuah kitai patut ngetanka nya,” ku iya.

Dulu ari nya, DSapit Managing Direktor Amalgamate­d Batteries Manufactur­ing (Sarawak) Sdn Bhd Dato Alan Tay Tze Poh dalam jaku pengelalau madahka nengah sempekat ke udah disain kededua deka bekerejasa­ma numbuhka kompeni ngaga bateri di Kuching dikena nangkup peminta guna domestik enggau menua luar.

Alan madahka nya sebengkah ari chara nengeri tu ari ti semina bepanggai ba bateri ke diimport kelimpah ari pengawa eksport bateri deka ngasilka penatai pemisi ngagai menua kitai nengah betukar mata duit.

“Asil ti pemadu manah ari projek tu deka meri awak ngagai industri automotif lebih besemekih tba timpuh lama.

“Laban tu deka disikap ngena teknologi pemadu baru sereta nemu bakani ngasilka Enhanced Flooded Battery (EFB) enggau bateri Absorbed Glass Mat (AGM) dikena nangkup peminta guna perengka pengangkut elekterik, hibrid, setengah hibrid enggau ke bukai,” ku iya seraya madahka sida iya nyambut manah Polisi Automotif Nasional (NAP) 2019.

Kelimpah ari nya, Chairman Jujiang Power Technology Co., Ltd, Wang Dong madahka kerejasama enggau ABM nya deka ngemeranka teknologi tinggi.

“Taja pan begunaka pengawa beranakka puku ke mayuh sepenyampa­u RM500 juta, tang aku arap bendar dalam mantu rayat Malaysia, kerejasama tu mesti mujur enggau bisi prospek pemansang ti chukup manah.

“Aku arap bendar tu semina dikena ngepun, laban deka mayuh agi projek ari Jujiang China jemah ila sereta kami tentu deka mantu dalam sosial enggau pemansang profesyen di Sarawak,” ku iya.

Sama bisi datai ba pengerami nya kemari Sapit Kepala Menteri Tan Sri Datuk Amar James Jemut Masing, Menteri Kaunsil Kandang Menua enggau Pengawa Berumah Prof Datuk Dr Sim Kui Hian enggau ke bukai.

— Gambar Chimon Upon

SAKSI: Abang Johari (belakang, tengah) ngemataka Wang Dong ngarika Jujiang betukar MoU ke udah disain enggau ABM, seraya diperatika sida ke bukai.

Newspapers in Malay

Newspapers from Malaysia

© PressReader. All rights reserved.