Stesyen ngagihka elekterik baru benung digaga di Serudit
KUCHING: Sarawak Energy Berhad benung ngaga stesyen ngagihka elekterik baru di Serudit di Pelilih Menua Betong, ti ditimpuhka tembu dalam taun baru.
Menteri Muda Utiliti (Kuasa Karan Menua Pesisir) Datuk Liwan Lagang madahka stesyen ngagihka elekterik nya deka nyadi pemekal kuasa karan besai ba pelilih menua Betong enggau kandang endur ti ngelinggi baka Engkilili, Spaoh enggau Debak ke dikearapka ulih mutarka penanggul ‘blackout’ nya.
“Stesyen ngagihka elekterik baru tu ditimpuhka tembu ba suku kedua 2020. Nya bisi enam jalai pemansut ti nyadung kuasa elekterik ke Betong, Ulu layar, Spaoh enggau Debak.
“Sebedau tu semina siti jalai pemasut aja iya nya stesyen ngagihka elekterik ari Engkilili ke nyadi pemansut besai kuasa elekterik ba kandang endur nya diatu.
“Stesyen ngagihka elekterik baru tu (ba Serudit) kami meri jamin iya nya deka ngaga stesyen ngagihka elekterik voltan ke pemadu tinggi iya nya 275,000 voltan tauka 275 kWatt. Tu begunaka belanja urung RM100 juta,” ku iya nyaut tanya tambah ari Mohammad Razi Sitam (GPS - Saribas).
Liwan mansutka pekara nya dalam sesi tanya saut ba Aum Kedua Penggal Ke-4 Kunsil Nengeri (DUN) Sarawak Ke-18 ba Kompleks Kunsil Nengeri ditu, kemari. Nambahka nya ku Liwan, Sarawak Energy mega benung ngaga sebuah stesyen ngagihka elekterik 33/11kV ba Jalai Junkong, Betong.
Kereja nusun baru kabel benung dipejalaika sereta dipelabaka tembu dalam bulan Januari 2020.”
“Enti pengawa nusun baru kabel udah tembu dipejalaika, pemisi bekal elekterik ba kandang pasar Betong ulih dikemanahka agi,” ku iya.
Berebak enggau tu iya madahka penanggul putus bekal elekterik ke nyadi sepemanjai taun 2019, ketegal bekal kuasa elekterik diatu disambung nengah kabel ti panjai ari stesyen ngagihka elekterik di Englilili ti kena mayuh faktor baka ribut kilat, angin ti ngasuh pun kayu tumbang, tiang kuasa elekterik ba tisi jalai nya dilantak ketegal penusah bebadi enggau ke bukai.
“Pekara ti nyadi nya ngujungka sekeda kabel elekterik di sepemanjai jalai tu ngeruga bekal elekterik di kandang menua Betong, Spaoh enggau Debak,” ku iya.
Nambahka nya, iya madahka pengawa ngaga Jalai Besai Pan Borneo mega ngujung sekeda insiden ti ngerusak kereban enggau kabel elekterik di sepemanjai kandang endur projek nya.
Kelimpah ari nya, putus bekal elekterik ke diperambu (planned shutdown) mega enggai nyadi enda nyadi ngambika pengawa mindahka tiang ke udah bisi dalam laluan pelaksaan Lebuhraya Pan Borneo.
Ba taun 2019 aja, bisi 10 kali putus bekal elekterik ke diperambu udah dipejalaika, iya nya 78 peratus ari semua putus bekal elekterik ke diperambu ba kandang endur tu, ku iya.