Pemesai Khas Nagang Dadah udah diengkah ba tetiap PPD di nengeri tu

KUCHING: Pemesai Khas Nagang Dadah (PPDa) udah diengkahka ba tetiap Opis Pelajar Pelilih Menua (PPD), dikena napi sereta mutarka penanggul penyalah gian dadah ba sekula.

Menteri Muda Pengintu Pengelantang Pendiau enggau Pengelantang Raban Bansa, Orang Indu, Ruang Bilik enggau Pemansang Nembiak Mit, Datuk Francis Harden Hollis madahka PPDa nya megai tanggungpengawa mantu ngatur program pelajar nagang dadah ba sekula ti dijaga sida.

“Sekula sekondari di Sarawak mega bisi bejalaika pengawa meresa ai kemi dikena nemu bagi nembiak ti tepejuh enggau penyalah gian dadah. Pengawa meresa ai kemi tu dipejalaika dua kali setaun ari Ejensi Nagang Penyalah Gian Dadah Menua (AADK).

“Bepelasarka ripot ari Opis Pelajar Nengeri Sarawak, nengah atur program OBID (Operasi/Intervensi Bersepadu Menangani Isu penyalahgunaan Dadah dan Substance), naka Oktober 2019, kitai udah mujur ngurangka penyampau nembiak positif ai kemi, dibandingka enggau taun 2018, taja pan penyampau sekula enggau nembiak ti diperesa ai kemi nambah.

“Taun tu, sepenyampau 3,649 iku nembiak diperesa ari 182 buah sekula sekondari di Sarawak ke alai 274 nembiak ditemu posistif dadah, dibandingka enggau taun 2018, sepenyampau 2,967 iku nembiak ti diuji ari 160 buah sekula sekondari enggau 301 iku nembiak ditemu positif,” ku iya seraya madahka nya ngayanka intervensyen ti dipejalaika naka ke diatu bisi asil.

Harden mansutka pekara nya lebuh ti nyaut tanya ari Dato Idris Buang (GPS - Muara Tuang) enggau Datuk Tiong Thai King (PSB - Dudong) maya sesi tanya saut ba Aum Kedua Penggal Ke-4 Kunsil Nengeri (DUN) Sarawak Ke-18 ti diatur ba Kompleks Kunsil Nengeri ditu, kemari.

Bejaku baru iya madahka, Polis DiRaja Malaysia nengah Opis Mansik Penyalah

Narkotik (JSJN) mega udah ngemansangka siti Prosedur Operasyen Standard (SOP) ti udah dikemendarka kena 10 Januari 2019 dikena betapi enggau penanggul salah nguna dadah ba nembiak sekula di Sarawak.

Kenyau SOP tu dikemendarka nyentuk Oktober 2019, bisi 56 iku orang ti nyadung dadah ditemu nyadung dadah ngagai nembiak sekula udah mujur ditinggang ukum ari baruh Akta Dadah Berbahaya (LangkahLangkah Pencegahan Khas) 1985 (Akta 316).

“Nambiak ti ditemu positif ai kemi, sida deka dianjung ngulu Kem Sayangi Hidup Elak Dadah Selamanya (SHIELD) lalu batang tuju program tu dikena meri penemu sereta pemereti ati bekaul penyalah gian dadah enggau empas ngagai pengerai.

“Batang tuju kedua, meri pengelandik ngambika sida enggai ngambi dadah, ngangkatka motivasyen enggau pemanah ulah nembiak ngambika nyulut enggau meri intervensyen sereta iring ngambika enda tepejuh ngagai ulah negatif kelebih agi dadah,” ku iya.

Dulu ari nya, Harden madahka opis menteri mega bisi numbuhka One Stop Committee (OSC) dikena Menangani Isu Dadah dan

Substance (MIDS) renggat nengeri enggau pelilih menua nyengkaum Kapit.

Naka Oktober 2019, ari 25 pelilih menua ke udah ditemu bisi 23 pelilih menua udah numbuhka komiti nya, baka Subis, Tebedu, Asajaya, Lawas, Pusa, Sri Aman, Samarahan, Sarikei, Sibu, Kuching, Betong, Bintulu, Saratok, Mukah, Miri, Limbang, Marudi, Daro, Bau, Lundu, Belaga, Serian enggau Kapit. Ari baruh Komiti OSC MIDS, siti program OBID udah dipejalaika berengkah 2017 sereta nya dibagi ngagai dua kompenan iya nya penerit adat enggau ukai penerit adat.

“Empas positif ari program OBID baka raban bansa enggau mayuh orang diatu berani datai ke mua meri penerang enggau ngaga ripot bekaul isu penyalah gian dadah enggau ‘substance’ di Sarawak.

“Kaul kerejasama ti efektif agi, tegap sereta mungkur semua pekara entara mayuh bengkah opis tauka ejensi penerit adat enggau ukai penerit adat dikena mutarka isu dadah enggau ‘substance’.

“Ngangkatka pemereti ati ngagai pemesai raban bansa dikena ngelangkar strategi enggau nyendiaka pelin ti nitihka peminta enggau trend penyalah gian dadah diatu ba endur diri,” ku iya.