Andau ke ditengah ngagai SK Sungai Kapit rubuh malam Hari Satu tu tadi

KAPIT: Sekeda papan ke dikena ngaga andau ti dikena meraka Sungai Kapit ngagai Sekula Primari (SK) Sungai Kapit udah rubuh kena malam Hari Satu tu tadi.

Ketegal nya, siku pengajarudah bakal ba kaki enggau tunjuk kaki iya, Taja pan enda balat, tang pengajar nya amat irauka pengelikun iya. Iya ngasaika diri benasit manah laban nyema iya labuh ke dalam Sungai Kapit, peninggi nya bisi lima puluh kaki lalu tambah mega ai sungai ka deras pengudah hari enda ngengetu ujan dalam kenadang beberapa hari ke sebedau nya.

Penusah nya nyadi urung pukul 9:20 malam Hari Satu. Tekala nya, raban sekula lalu meri tanda bejejaga dikena ngelalau orang ti betengahka andau nya ngambika bejejimat agi.

Ketegal penusah nya, Kepala Pengajar, Mohammad Sabli Bin Haji Badi lalu ngaga ripot ngagai Opis Pelajar Kapit ngambi beratka sentang pengerusak andau nya.

Semina andau nya kenyadi jalai penyambung ari Jalai Bukit Goram ngagai sekula nya. Sepuluh taun ke sebedau tu, andau nya udah dikemanah nengah projek beripai ti diatur Opis Pelajar Kapit.

SK Sungai Kapit urung iya lima kilometer penyauh ari Pasar Kapit nengah Jalai Bukit Goram. Ba sekula nya bisi 397 iku nembiak, 31 iku pengajar sereta 10 iku bala staf ke bukai.

Sekula nya ba seberai Sungai Kapit slalu semina ulih dilawa kin nengah andau.

Sebedau tu, lebuh Kepala Menteri Sarawak Datuk Patinggi Abang Johari nemuai ngagai Kapit ba taun 2018, udah ngemendarka RM12 juta dikena ngaga jalai enggau jematan besi dikeana nyambung alai Bukit Goram ngagai sekula. Pengawa nya mengkang dipejalaika.