Bisi dua alternatif dikena mutarka penanggul Dewan Suarah Sarikei
KUCHING: Perintah dipinta ngemeratka dua langgur alternatif sentang chara mutarka penanggul Dewan Suarah Sarikei, dikena nangkup guna rayat ba kandang menua.
Dato Sri Huang Tiong Sii (GPS-Repok) madah, Dewan Suarah Sarikei ke diatu ba Jalai Nyelong udah digaga kenyau 31 taun ke udah, enda ulih agi nangkup guna peranak Sarikei kelebih agi maya ngatur bemacham pengerami ba palan nya.
“Nya alai, aku deka mantaika dua langgur alternatif dikena mutarka penanggul nya, Keterubah ngangkatmanah begunan dewan suarah ke diatu nengah chara ngaga bengunan tambah.
“Berundingka palan engkah kerita beringkat dikena mutarka penanggul isu ruang endur engkah kerita ti enda chukup,” ku iya lebuh ti bejuraika Bajet Sarawak 2020 ba aum DUN ditu kemari.
Huang madah, kedua nya, perintah engka tau berunding ngaga baru dewan suarah ke baru ba palan bukai, iya nya di seberai Sungai Nyelong.
Ku iya, dewan suarah baru nya ila deka bisi mayuhguna sereta ulih nangkup guna mensia mayuh di Sarikei.
Ku iya penadai stadium tetup mega ngenusahka mensia mayuh ngatur mayuh bengkah pengawa baka lumba enggau main, belepa, begempuru besai kelebih agi bekaul enggau batang pengerami nengeri.
Ke pemadu baru iya nya maya ‘Majlis Jamuan Teh Hari Kebangsaan’ kena 31 Ogos 2019, ku iya.
“Ba aspek Lumba enggau Main, Sarikei mayuh mantu ngadaka jaguh lumba enggau main ba renggat umur.
“Kelebih nya, Sarikei suah dipilih nyadi tuai pengatur bemacham pekit lumba enggau main,nya alai isu enda chukup perengkaguna nyadi pemar besai lebuh ke nyadi pengatur ,”ku iya nyemetak
Berebak enggau nya, iya minta ngambika digaga sebuah Stadium ‘Tertutup Bersepadu’ enggau taman tauka palan rekreasyen ba Sarikei dikemendarka ila.
SIBU: Yayasan Buah Pinggang Sibu (SKF) ngarapka sepenyampau RM50,000 ulih digumpul ungkup program belanda pengasih SKF Kidney Run ti diperambu deka dipejalai kena 15 Mac 2020 ba Dataran Tun Tuanku Bujang.
Chairman Lembaga Amanah SKF Temenggong Dato Vincent Lau Lee Ming madahka program belanda pengasih nya nyadi program kepenudi beserimbai enggau pengawa ngintu Hari Tungkul Sengayuh Sedunya 2020 SKF.
“Program belanda nya diatur SKF enggau kerejasama Sibu Xsport CLub ke mega ngarapka penyereta urung 1,500 pesereta,” ku iya nerang ngagai pengarang berita ba bilik aum SKF ditu, kemari.
Program belanda nya dibagi ngagai dua kategori iya nya ‘3km fun run’ enggau 5km ungkup laki enggau indu, lalu sida ti deka nyereta program belanda tu ulih ngambi pom ba palan SKF No.6, Jalai Chong Jin Bock.
Kelimpah ari nya, aktiviti bukai ke sama bisi diatur iya nya program bebasikal Kidney Race kena 1 Mac 2020 enggau kerejasama Sibu’s Swan Cycling Club udah nya ditangkan enggau pekit nyura diatur begulai enggau United People’s Activity Association kena 8 Mac ba Sekula Sekondari (SM) Wong Nai Siong.
“Kitai mega deka ngatur program licha pengerai enggau kerejasama Melilea (M) Sdn Bhd kena 14 Mac 2020 ba Hotel Kingwood.Tema pengerami tu ‘Irup Ai Mayuh, Ke Pengerai Tungkul Sengayuh’,” ku iya.
Lau madahka batang tuju ngatur program tu iya nya dikena ngiri pemereti ati ngagai mensia mayuh bekaul pemerat nyaga pengerai buah pinggang.
Kelimpah ari nya, ku iya, SKF udah numbuhka Unit Pemereti Ati Tungkul Sengayuh (KAU) kena 2015 dikena nyungkak pemereti ati sereta meri pelajar ngagai mensia mayuh bekaul penyakit, chara berubat sereta beputung mindahka tungkul sengayuh.
“Kitai bebendar deka ngangkatmanah servis sereta staf, ngangkatmanah injin sereta perengkaguna dalam pengawa mantu mayuh agi pesakit.
“Kena 2016, kitai bisi 38 iku pesakit ke udah berejister. Penyampau tu nambah ngagai 67 iku nyentukka bulan Ogos taun tu,” ku iya seraya madahka SKF bisi 27 unit injin dikena betuchi.