Bajet nengeri patut diserenih baru ke pemaik rayat
MIRI: Bajet nengeri patut diserenih baru tauka nya enda meri sebarang reti ngagai rayat, pia ku Kaban Parlimen (MP) Miri Dr Micheal Teo.
Ku iya, bajetsekali tu enda sama baka ke sebedau tu ti bisi betambah RM2 bilion ke patut dipansik baru.
“Nama ti pemadu beguna dalam bajet tu iya nya bakani duit nya dipelanja. Bajet nya enda meri sebarang reti nyema enda ngena prosedur ke betul.
“Nya patut dipansik baru lalu tentuka tetiap bajet nya dikena enggau memanah ngambika rayat ulih meda pemaik ke diterima sida ari bajet ti udah dibantaika nya,” ku iya.
Dr Teo madah munyi nya ngagai pengarang berita lebuh ti meri komen bekaul Bajet Nengeri 2020, sepengudah bejadika 'Majlis Anugerah Kecemerlangan Kokurikulum' Sekula Primari (SK) Jalan Bintang ba palan bebelika barang Bouleverd ditu, kemari.
Ambika chunto, ku Dr Teo, nyema merambu bajet ungkup begunan sepital, tang sepengudah dibantaika bajet, projek nya enda dipejalai, nya tetap enda meri sebarang pemaik ngagai rayat.
“Bajet nengeri tu baka bajet ungkup pengawa bepilih iya nya sida diatu ngaga enggau ngenyit projek ke patut ditembuka berapa taun ke udah.
“Pengawa bepilih nyauka semak lalu lapa agi nyimpan RM30 bilion ke patut dikena dalam ngemanahka nama ti kurang di Sarawak baka bekal ai, elekterik, sekula enggau perengka pengangkut ngelama tu?,” ku iya nanya.
Nitih ku Dr Teo, bajet di renggat perintah besai Pakatan Harapan (PH) bebida iya nya tetiap ripot patut digaga ba ninting tiga bulan dikena ungkup bajet ke udah dipelanja.
“Bajet nya siti pekara, lalu bakani bejalaika nya tu pekara bukai,” ku iya nyemetak.
Dalam pekara bukai, ku iya nerang, Parti Keadilan Rakyat (PKR) deka ngatur konvensyen PKR ke-20 taun ti keterubah diatur kena 23 November tu.
“Kitai deka ngintu pengerami PKR ke-20 PKR ditumbuh lalu udah tentu Presiden PKR Dato' Seri Anwar Ibrahim deka datai nyadi temuai dipebasa maya tu ila.
“Sebedau tu udah digaga ba palan bukai lalu sekali tu deka diatur ba Miri laban Miri entara mengeri besai ti keterubah sepengudah Reformasyen kenyau 20 taun ke udah,” ku iya.
Ku iya nambah, raban sida merambu lebih 1,000 iku kaban ari selampur menua deka begempuru ditu dikena nyereta konvensyen nya nyengkaum bala menteri kabinet.