PVTMS deka ngatur aum gerempung nya ba Miri, Bintulu
SIBU: Gerempung Veteran Soldadu Malaysia Nengeri Sarawak (PVTMS) deka ngatur pengawa baum ba Miri enggau Bintulu.
Presiden PVTMS, Francis Yeo Wan Hui madah, ba Miri aum tu deka diatur kena 9 November, pukul 2 lemai ba Kelab Gymkhana, Miri.
Lalu ba Bintulu, aum nya deka berengkah pukul 9 pagi, kena 10 November bepalan ba Bilik Mesyuarat Agensi Penguatkuasa Maritim Malaysia (APMM).
“Semua raban veteran ke dikangau datai ba aumnya dipinta bekenaka gari ke engkeman enggau program tauka baju korporat.
“Berebak enggau program tu mega, Pekara Veteran Soldadu Malaysia (JHEV) Sarawak bisi muka kaunter mindah kin kitu, ngambika bala ex-soldadu ke bc ati ka enggau masuk gerempung ngerejista diri,” pia ku iya bejaku enggau pemerita.
Nangkan ke nya, Francis madahka tuju aum tu iya nya dikena ngerapitka kaul bala raban veteran ti udah ngerejister diri enggau PVTMS, lalu nengah program tu mega sida ulih begiga ke pangan diri kelebih agi bala ti lama enda ditemu.
Ngagai bala raban veteran ti baru deka ngerejister diri enggau PVTMS tu sida patut mai 3 iti gambar saiz pasport, siti salin Bat D92/86/84 sereta salin kad pengelala laki bini.
Pia mega, sida ke baru deka bebayar sepenyampau RM20 dikena nyadi raban gerempung tu sereta RM85 diungkup kena mayar baju korporat.
Presiden PVTMS nya nesau semua raban veteran gerempung sitak Miri enggau Bintulu, sampal datai enggau ngulu aum tu.
Tanya enggau silik agi ti bekaul enggau program tu, tau ngiga Pemantu Pemesai Tadbir Opis Syafika Nursahara Binti Abdullah ba lumur 084-349755/010-9337056 tauka Presiden PVTMS, 0198890705.