Bantaika bukti perintah nengeri bisi ngambi tanah
Ali Biju patut ngenukuka dulu pekara nya enggau enggau Opis Tanah enggau Survei (JTS) nyengkaum perintah: Dr Juanda
KUCHING: Ali Biju (PH - Krian) ditanggi mantaika bukti ti mandangka tanah ti disukat ari baruh Seksyen 6 Kanun Tanah Nengeri diambi perintah.
Datuk Dr Juanda (GPS - Jamoreng) disempulang beberapa pengari rayat ari Gabungan Parti Sarawak (GPS) bepenemu, Ali ti mega Kaban Parlimen Saratok nya patut ngenukuka dulu pekara nya enggau opis ti bekaul.
“Ali Biju patut meresa dulu enggau Opis Tanah enggau Survei (JTS) sereta perintah iya nya nadai sebarang rikod naka ke diatu bepelasarka tanah ti disukat ari baruh Seksyen 6 diambi perintah.
“Enti jaku tuduh iya nya betul, pandangka bukti, kami nanggi iya (Ali), laban diatu iya ‘nyual ubat’ tu, sida nipu rayat taja pan pengeran perintah nyukat Seksyen 6 tu dikena nentuka tanah ti dipinta rayat nya ulih dikelai dulu udah nya baru (disukat) individu ari baruh Seksyen 18.
“Diatu enti betul jaku tuduh iya (Ali), kami deka iya mai bukti dikena mandangka iya enda nipu rayat di nengeri tu,” ku iya dalam aum pengarang berita.
Juanda ba aum pengarang berita nya disempulang Gerald Rentap Jabu (GPS - Layar), Christopher Gira Sambang (GPS - Tamin), Miro Simoh (GPS - Serembu),
Jefferson Jamit unyat (GPS - Bukit Goram), Chukpai Ugon (GPS - Murum) enggau Ketuai Nembiak SUPP Michael Tiang.
Nitihku raban tu, Ali mantaika pekara maya ti ngenggaika pekara ti dibantaika Dato Sri nancy Shukri (GPS - Batang Sadong) maya bejuraika Perambu Belanja Menua 2020 ba aum Dewan Rakyat. Ali mega madahka enda setuju perintah besai meri ungkup belanja ngagai Seksyen 6 tang iya setuju enti diungkupka ngagai pengawa nyukat ari baruh seksyen 18 (individu).
Dalam aum pengarang berita ti sama, raban tu ditanya sekali ulih ke enda terus ngaga pengawa nyukat ari baruh Seksyen 18, sida madahka pekara nya ulih enti tanah nya nadai beserak enggau pangan diri sereta ke bukai, tang ke patut iya nya berengkah enggau pengawa nyukat ari baruh Seksyen 6 udah nya baru Seksyen 18.
“Laban enti nadai Seksyen 6 nuan enda ulih nyukat ngagai Seksyen 18.
“Komuniti rumah panjai mayuh, nya alai patut dikelai (tauka disukat) besai dulu udah nya enti semua setuju nengah JKKK rumah panjai nentuka bagi individu, baru kitai bejalaika pengawa nyukat Seksyen 18,” ku Juanda.
Enti jaku tuduh iya nya betul, pandangka bukti, kami nanggi iya (Ali), laban diatu iya ‘nyual ubat’ tu, sida nipu rayat taja pan pengeran perintah nyukat Seksyen 6 tu dikena nentuka tanah ti dipinta rayat nya ulih dikelai dulu udah nya baru (disukat) individu ari baruh Seksyen 18.
Datuk Dr Juanda
Kaban Kunsil Nengeri Jamoreng