Anang begendangka Seksyen 6 nyadi polemik politik: Miro
KUCHING: Kaban Kunsil Nengeri (ADUN) Serembu, Miro Simuh nanyaka nama tanggungpengawa perintah besai mantu mutarka penanggul nyukat tanah Hak Adat Bumiputera (NCR) di nengeri tu.
Ku Miro, ari baruh Bajet 2020, perintah besai nadai nyendiaka agih belanja dikena nyukat enti dibanding enggau perintah ke suba.
Tambah mega Kaban Parlimen Saratok, Ali Biju ti nyadi ADUN Krian ku iya,enggau temegah ati ngemba ba aum parlimen ke alai iya enda setuju enggau pemeri belanja dikena ngemujurka nya.
“Iya mega nanya pematut bisi Seksyen 6 ti nyadika polemik politik Pakatan Harapan (PH) Sarawak.
“Nama nadai puku politik bukai ke dikena kelimpah begendangka Seksyen 6, Undang - Undang Tanah
Sarawak enggau isu perintah nengeri ngerampas tanah.
“Nyema amat bisi jaku tuduh ke munyi nya, aku minta ADUN ari Krian mandangka bukti dini endur lalu berapa pemesai tanah ke udah dirampas perintah nengah Seksyen 6 nya,” ku iya.
Iya bejaku munyi nya lebuh bejuraika Bajet Sarawak 2020 ba aum Kunsil Nengeri (DUN) ditu kemari.
Ngenang sentang isu nyukat tanah NCR dalam kandang menua Serembu, Miro madahka tiga buah genturung pendiau udah nganjung peminta ngambika disukat ari baruh Seksyen 18.
Genturung pendiau nya, Kampung Skio, Kampung Seropak enggau Kampung Seromah dalam pelilih Bau.
Iya alai iya minta ngambika peminta ketetiga buah genturung pendiau nya dikemendarka disukat taun baru.
Tu ku iya, nyengkaum sekeda genturung pendiau bukai kelebih agi ba kandang menua Bidayuh ti patut dikemeratka ngambika disukat ari baruh Seksyen 6 tauka Seskyen 18.