Seminar Chukai Menua 2019 LHDN udah digulu 350 iku
MIRI: Bisi 350 iku udah ngulu Seminar Chukai Menua 2019 ti diatur Opis Asil Dalam Menua Malaysia (LHDN) ba Hotel Pullman Miri Waterfront, ditu kemari.
Seminar Ke -37 nya digulu kaban korperat, raban orang dagang, auditor, menijart enggau pengemeran undang-undang, akauntan, bala direktor kompeni, penyanding penemu pekara wang, sekretari kompeni sereta individu.
Seminar nya udah dipenyadika Direktor LHDN Sarawak Ramlot Keli ngarika Ketuai Pemesai Eksekutif LHDN Malaysia, Dato’ Sri Sabin Samitah.
Sabin ba teks jaku iya ti dibacha Ramlot madah, batang objektif seminar nya diatur alai meri penerang ke pemadu baru ngagai pengeran chukai, gerempung profesional, bala pengaji enggau mensia mayuh senentang sekeda isu ubah undang-undang chukai ti baru dibantaika dalam jurai bajet kena 11 Oktober tu tadi.
“Nengah seminar tu, nya tau nyadi siti pelasar alai ngulihka penerang ke pemadu baru sereta nyata ari LHDN diri empu.
“Ungkup taun tu seminar sama diatur ba 23 buah palan di serata menua dikena nentuka meri pemaik ngagai semua pemayar chukai,”ku iya.
Seriris enggau rambai jaku ‘Memacu Pertumbuhan enggau Keberhasilan Saksama ke Arah Kemakmuran Bersama’ bisi dua batang topik dipejuraika ba seminar nya.
Batang topik iya nya ‘2020 Budget Proposals’ dikenataika Eksekutif Asil Kanan I, Opis Sapit Ketuai Pemesai Eksekutif (Polisi), LHDN Malaysia Nor Ashikin Mohd Nadzari, lalu topik kedua iya nya sentang ‘Post SVDP and The New Horizon’ dipejuraika Direktor Bagi Perambu Chukai Agresif Opis Pengawa Khas LHDN Malaysia Muhammad Azhari.
Sabin ngarapka nengah seminar nya, bala peserta ulih ngena memanah platform nya ldikena ngulihka pemereti ti nyata ngambika ulih mantu bejalaika tanggungpengawa nyadi pemayar chukai enggau ngasi agi.