JBALB dipinta lengkas ngaga HLPWT ba Bukit Aguk di Julau
KUCHING: Perintah Sarawak nengah Opis Bekal Ai Menua Pesisir (JBALB) dipinta ngenyampatka pengawa ngaga sebuah ‘High Level Pressure Water Tank’ (HLPWT) ba Bukit Aguk, Julau.
Rolland Duat Jubin (GPS - Meluan) madahka nya dikena mutarka penanggul ai ti enda kuat ke balat nyadi sereta ditapi peranak endur nya ba semanjai Jalai MeluanEntabai ti bisi 56 buah rumah panjai.
Iya madahka, penanggul ai ti enda kuat nya mega ditapi peranak ba semanjai Jalai KDN.
“Aku udah suah mantaika penanggul tu dalam aum ke sebedau tu tang nyentuk diatu nadai udah sebarang pengawa proaktif tauka inisiatif ari JBALB ba pengawa mutarka lengkas penanggul ai ti kurang kuat ke ditapi peranak ba dua kandang endur ke disebut nya tadi,” ku iya, kemari.
Rolland mansutka pekara nya lebuh ti bejuraika perambu belanja nengeri 2020 ba Aum Ke-2 Penggal Ke4 Kunsil Nengeri (DUN) Sarawak ti diatur ba Kompleks DUN ditu.
“Aku mega minta JBALB ngenyampatka pengawa nyambung bekal ai paip beresi ngagai rumah panjai ke bisi ba semanjai Jalai Nanga Engkamop ke Nanga Entaih, Julau ti mega bisi klinik pengerai, sekula enggau lima buah rumah panjai,” ku iya.
Nambahka nya, senipak enggau perambu belanja nengeri 2020 ti ngemeratka pemansang di menua pesisir, perintah nengeri nengah Jabatan Kereja Raya (JKR) Sarawak dikearapka ulih ngemendar sereta ngenyampatka pengawa jalai ari Nanga Entaih ke Rh Sang ba Rantau Chire semanjai 16 KM dikena mantu orang betanam betupi mai pansut asil sereta dijual, ku iya.
Ku iya, jalai ti nyambungka Nanga Entaih ke Rh Sang nya ila deka meri penguntung ngagai 12 buah rumah panjai ba sepemanjai jalai nya ila.
“Aku mega minta JKR Sarawak ngambika ngaga jalai alun ari Kubu Brooke ti ba Nanga Meluan ke Rh Gerasi ba Nanga Ju.
“Enti jalai ti nyambungka Kubu Brooke enggau Rh Gerasi ba Nanga Ju tu ila deka diasaika tauka nguntungka 13 buah rumah panjai ke diatu ti bepanggai ngagai sungai enggau jalai balak ti nyadika penyambung.
“Kelimpah ari nya, aku mega minta Perintah Sarawak ngambika ngambi Fasa Ke-2 pengawa ngaga jalai ari Nanga entabaii ke Rantau Limau laban ungkup dikena bejalaika fasa 2 ngaga jalai nya udah dikinsil perintah besai,” ku iya.