Pengawa DID ngelasi, ngenalam Sungai Sebab udah tembu
BINTULU: Pengawa ngelasi enggau ngenalam Sungai Sebab di kandang menua belakang Kampung Kemunting Jalai Sebiew ari Opis Parit enggau Entali Ai (DID) dikena mutar penanggul ti ditapi lebuh dituntung penusah ampuh bah tunggal di kandang menua nya dipeda udah tembu berindik ari pengelengkas kereja ti digaga.
Pekara nya udah dipadahka ngagai Unit Komunikasyen Perintah Sarawak (UKAS) nengah penerang ari Pemesai Opis Pelilih Bintulu Muhammad Dino Amid bekaul ripot berita projek nya ti udah dipansutka ba Utusan Borneo kemari.
Sebedau nya, pengawa matau udah digaga Palan Servis Kunsil Nengeri (DUN) N67 Jepak begulai enggau ejensi perintah ti ngaul raban DID, Pentadbiran Bahagian Bintulu (Opis Residen enggau Opis Pelilih Bintulu), Opis Pemansang Bintulu (BDA), Kaunsil Ai Kandang Menua Utara (LAKU), ketuai komuniti enggau peranak Kampung Kemunting kilah ensanus.
Pengawa matau tu berindik ari deka meresa sistem parit ti sistematik ungkup kandang endur ti kena pansa projek nirika Junction 9 Apartmen ari kompeni pemansang pengawa berumah BGC Development Sdn Bhd.
Pengawa matau kereja ngelasi enggau ngenalam Sungai Sebab ari DID Bagi Menua Bintulu tu iya nya projek ti dikena mutarka penanggu berindik ari penusah ampuh bah tunggal di Kampung Kemunting sereta meresa lalu matau utiliti ti bekaul enggau pengawa nyambung paip ari pala paip nyentuk ke genturung pendiau ti bisi mansa taba projek lalu isu bukai ke bekaul enggau LAKU Bintulu.
MIRI: Pemujur ngatur ‘Anugerah Carta Siapa Juara’ (ACSJ) 2019 ditu, bulan siti nyin tadi enggau penatai lebih 1,000 iku mensia mayuh ngayanka industri muzik di nengeri tu majak ngerembai.
Kaban Parlimen (MP) Miri Dr Micheal Teo madahka mayuh sida ti rinduka muzik Iban udah datai tumu berengkah pukul 3 lemai laban deka meda artis dikerindu sida.
“Kitai ngarapka ACSJ ti deka datai ila diatur ba ditu baru laban program nya udah mujur ngempuruka mayuh orang ti rinduka lagu Iban ari kandang menua Utara,” ku iya ditu kemari.
Teo ti tekenyit enggau penatai mensia mayuh ti ngemataka ACSJ 2019 ba renggat kepenudi nya udah nambah pemayuh perais ungkup tikit benait ari tiga ngagai lapan.
“Kitai meda penatai mensia mayuh ti rami lalu nya mih kelai nyukung, aku lalu nambahka pemayuh perais nyabut tikit benasit iya nya telefon binching ngagai lapan unit,” ku iya.
Iya mega madahka nyema pengawa ngatur ACSJ digaga ba Miri taun nyin ila, iya deka meri sepuluh telefon binching nyadika perais nyabut tikit benasit.
“Kitai dekaka mayuh agi mensia mayuh datai ngagai ACSJ lalu deka meri bemacham perais tikit benasit nyangkaum telefeon binching,” ku iya.
Teo mega udah muji Radio Televisyen Malaysia (RTM) ke mayuh udah ngatur program pemerindang sereta meri penerang ngagai mensia mayuh.
“Mayuh program udah diatur ti baru sereta bedau kala diperambu lalu ari nya kitai ulih meda penyampau mensia mayuh ke bisi datai ba program stesyen nya majak nambah,” ku iya nerang.
Teo sama bisi nyuaka perais ngagai pemenang nyabut tikit benasit ACSJ 2019 seraya dikemata Menijer Stesyen RTM Miri, Zaidi Bujang.
Entara batang tuju ACSJ iya nya deka ngangkat sereta ngelakuka lagu Iban dalam industri muzik Sarawak ngambika dikelala ba renggat global nengah RTM.
ACSJ tu mantaika penyereta penanyi, komposer sereta penengkebang leka lgu ngambika ulih nyadika rangkat tanda ba Industri Muzik Dayak kelebih agi ba lagu Iban.