Dua tim ari SMK Riam udah nyulut ba CIGIF 2019
MIRI: Sekula Sekondari (SMK) Riam udah mujur ngangkatka nama ba tikas antarabansa sepengudah menang midul emas ba ‘Korea Cyber International Genius Inventor Fair’ CIGIF) 2019.
Prinsipal SMK Riam Normah Abdul Latif chukup temegah ati enggau punyulut nya sepengudah sekula nya ngalahka 70 tim ari menua bukai.
“Tim kitai tu iya nya Tborneo udah diarika Natalie Gituen Liso, Law Zhen Yen enggau Allycia Nanu Bong mega udah bulih gelar khas ‘World Inventors Association’ (WIA),” ku iya ba siti penerang media kemari.
Tim nya udah mujur ngasilka penambah asai pemakai natural ke ngena daun tubu ti digaga baka tepung enggau kiub ke nukar penamabah asai pemakai tambah monosodium glutamate (MSG).
Ku Normah madah, siti agi tim iya nya Yucava ti diarika Daniel Dennis, Nurnaniza Hasmady enggau Eugenia
Lavang Jalong udah mujur bulih midul pirak sereta gelar khas ‘Asia Creativity Invention Association’ (AICA).
Tim Yucava udah mujur ngaga sudu ti manahka rampa menua ke ganti sudu plastik.
Pekit nya ti dipejalai 2 enggau 3 November tu udah disereta urung 70 tim ari 12 buah menua baka Korea, Vietnam, Hong Kong, Taiwan,
Amerika Syarikat, Kanada enggau Indonesia.
“Kitai mega bulih gelar khas CIGIF ‘Teacher Achievement’ ti diempu pengajar Forinna Rossini Lanity, Law Sie Siek enggau Enjila Ales.
“Nya ulih nambahka pemayuh gelar ti udah diterima Kelab Young Inovator SMK Riam ti mega udah nyadi pengandal sekula nya,” ku iya nerang.
Iya mega udah beterima kasih ngagai semua raban nyengkaum Opis Menteri Pelajar Sains enggau Pansik Teknologi Sarawak (MESTR), Sarawak Multimedia Authority, Opis Pelajar Pelilih (PPD) Miri, Gerempung Apai Indai enggau Pengajar (PIBG) SMK Riam, bala apai indai nembiak sereta pengajar ti udah begulai nempa penyulut nya.