Badu ngena leka jaku ulun, ku Ali

Utusan Borneo (Sarawak) - - Berita Iban -

KUCHING: Ketu ke ari ngena leka jaku ulun laban nya jaku ti chukup nadai basa sereta ngemaruhka orang bukai, pia ku Ali Biju (PH - Krian).

Dulu kelia, raban ulun tu betapi enggau pengidup ti mrinsa sereta enda dipebasa, sida diulun pengudah ditangkap sereta alah dikayau. Pilih sida sekalika deka nyadi ulun tauka pumpung pala ti nyadi tropi.

Taja pia ku Ali, tradisyen ulun tu udah lama dilengka lalu ulun dilepaska nengah proses asal raban bansa Iban ti dikumbai Adat Tembang tauka Gawai Betembang.

“Leka jaku ulun tu dalam jaku Iban kebendar iya chukup jai sereta dikena ngemaruhka orang bukai.

“Ba raban bansa Iban Saratok ti agi beradat, nuduh sesiku nyadi ulun deka ditinggang ukum adat ti berat,” ku iya nerangka pekara nya maya bejuraika perambu belanja nengeri 2020 ti dibantaika Kepala Menteri Datuk Patinggi Abang Johari Tun Openg ba Aum Ke-2 Penggal Ke-4 Kunsil Nengeri (DUN) Sarawak Ke-18, kemari.

Bejaku baru, Ali madahka diatu semua orang ngemeran sereta berat agi bebasaka pangan diri.

“Nya alai, aku minta semua orang ngambika ngetu nuduh pangan diri ulun dalam Kunsil Nengeri tu,” ku iya seraya madahka diri enda lantang ati enggau sekeda orang ti madah bakih ari PH nyadi ulun ngagai orang bukai.

Dalam isu bukai, lebuh ti ngenang jaku ti suah dikena lebuh belabanka penemu ‘enti enda bula, enda menang’ ti dikaitka pengari rayat GPS enggau iya, Ali ngaku iya nyebut nya ba sebengkah pengerami dalam sitak ke diarika iya.

Tang ku Ali madah ,iya ngena jaku nya semina dikena iya betundi ti dituju ngagai GPS.

Newspapers in Malay

Newspapers from Malaysia

© PressReader. All rights reserved.