Rumah Belawan di Ng Apo deka dibekal elekterik nengah SARES ba taun 2020

Utusan Borneo (Sarawak) - - Berita Iban -

KUCHING: Rumah Belawan di Ng. Apo deka ngasaika kuasa elekterik nengah program Skim Elektrik Alternatif Luar Bandar Sarawak (SARES) ba taun 2020.

Menteri Muda Elekterik Menua Pesisir, Datuk Liwan Lagang madah, Rh Belawan di Ng Apo nya entara lima buah rumah panjai di kandang menua ulu Sungai Ulu Kanowit dalam sitak Kunsil Nengeri (DUN) Meluan deka disambung kuasa elekterik nengah program Skim Elekterik Alternatif Luar Bandar Sarawak (SARES) enggau projek rayat.

“Lima buah rumah panjai dalam kandang menua ulu Sungai Ulu Kanowit ke deka bulih bekal kuasa elekterik iya nya Rh Belawan di Ng. Apo nengah projek SARES Fasa 5 ti dipelaba tembu ba taun 2020.

“Program SARES ba Rh Belawan di Ng. Apo projek nya begunka ungkus belanja urung RM650,000 ti meri pengelanta­ng ngagai 12 ruang bilik,” ku iya lebuh ti nyaut tanya tambah ari Rolland Duat Jubin (GPS - Meluan).

Liwan madahka pekara nya ba sesi tanya saut Aum Ke-2 Penggal Ke-4 Kunsil Nengeri (DUN) Sarawak Ke-18 ti diatur ba Kompleks DUN ditu, kemari.

“Nambahka nya, Rh Ringgit enggau Rh Linggong di Ng. Apo sereta Rh. Bendali enggau Rh mancha di Ng. Ensiring nengah Projek Rayat Last Miles Fasa 3 dipelaba tembu pun taun 2021,” ku iya lebuh nyaut tanya ari ADUN Meluan.

Kelimpah ari nya, Liwan mega madahka perambu nyambung mengeri Limbang ngagai Grid Nengeri iya nya sebagi ari ‘Northern Grid Extension Project’.

“Projek tu dipelabaka deka tembu ujung taun 2022,” ku iya lebuh ti nyaut tanya ari Paulus Palu Gumbang (GPS - Batu Danau) ti betanya pasal status projek nya.

Nambahka nya lebuh ti ditanya kemaya pengawa ngaga stesyen ngeluar, nganjung enggau ngagih 275 kilovolt (kV) tembu, Liwan madahka dipelabaka tembu ba suku keterubah taun 2022.

“Stesyen ngeluar, nganjung enggau ngagih 275 kV ba mengeri Limbang dipelabaka tembu ba suku keterubah taun 2022.

“Lalu mengeri Limbang tu deka bulih bekal tu nengah grid 275 kV ari tiang pemanchar Bunut sereta dipelabaka tembu ba suku keterubah 2022,” ku iya lebuh nyaut tanya tambah ari Batu Danau.

NYAUT TANYA: Liwan meri penerang maya sesi tanya saut, kemari.

Newspapers in Malay

Newspapers from Malaysia

© PressReader. All rights reserved.