Perintah nengeri sedia mantu pekebun ngerembaika dagang sida
Nengah pengeransing tu, perintah Sarawak ngembuan sekeda program ungkup pekebun buah di nengeri tu
SERIAN: Perintah nengeri sedia mantu pekebun buah ti ngayanka pengandal sereta komitmen dalam pengawa ngerembaika dagang sida.
Sapit Kepala Menteri Datuk Amar Douglas Uggah Embas madahka perintah ngembuan sekeda langgur program dikena mantu bala pekebun buah.
“Entara nya nyengkaum meri geran, duit jali ke modal ngemunka kebun kelimpah ari nyendiaka servis meri buah runding sereta penemu ari sukut teknikal enggau profesional.
“Kelimpah ari nya, perintah mega bisi numbuhka palan ngumpul, palan proses enggau mungkus tauka CPPC dikena mantu nyual asil buah bala pekebun,” ku iya.
Iya madah munyi nya lebuh ti ngelawa ke Semukoi Agro Farm Sdn Bhd ba KM79 Jalai Serian/Sri Aman ditu kemari.
Kebun nya ti bisi nanam buah ‘Rock Melon Jepun’ ke diempu siku orang dagang buah bansa Dayak iya nya Terence S. Landong.
Berebak enggau nya, Uggah temegah ati meda penyampau orang dagang bumuputera ti majak nambah kelebih agi dalam sektor betanam betupi.
“Sida megai tanggungpengawa sida dikena mantu nangkup aspirasyen nengeri ti deka nyadi pengeksport produk pemakai datai ba taun 2030.
“Aku ngarapka sida deka nitiha singkang orang dagang bukai ti mujur enggau ngulihka setipikit MyGAP enggau setipikit bukai dikena ngemujurka produk sida rembus ba dagang luar,” ku iya.
Bejaku bekau enggau kebun di ditumbuhka Terence enggau sida sebilik, fasa keterubah nanam 5,000 anak pun Rock Melon udah digaga berengkah 7 Mac taun tu tadi.
Ba bulan Mei taun tu, bisi 6,000 kilogram buah Rock Melon nya udah diambi ti lalu ditangkan enggau pengawa ngambi
Entara nya nyengkaum meri geran, duit jali ke modal ngemunka kebun kelimpah ari nyendiaka servis meri buah runding sereta penemu ari sukut teknikal enggau profesional.
Datuk Amar Douglas Uggah Embas
Sapit Kepala Menteri
buah nya ke bisi 8,000 kilogram kena bulan Ogos tu tadi.
Buah Rock Melon ti ditanam ba kebun nya ulih nyapai berat entara dua ke tiga kilogram sigi buah.
Ba bulan September tu tadi, bisi 5,300 pun agi ti ditanam Terence lalu pengawa ngambi buah nya ti keterubah udah digaga minggu keterubah bulan tu tadi.