Tanggungpengawa KWKPK berat nentuka kualiti pelajar tumu nembiak mit: Fatimah
KUCHING: Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit (KWKPK) ngembuan tanggungpengawa ti besai dalam nyaga, ngembing enggau nyeridi pelajar ti bekualiti di nengeri tu.
Menteri KWKPK, Dato Sri Fatimah Abdullah madah, mayuh macham pengawa udah dipejalaika dikena nyapai juluk tu nengah sukung penuh ari perintah Sarawak ti dipegai Kepala Menteri Datuk Patinggi Abang Johari Tun Openg.
Nya alai, ku iya, perintah Sarawak andal pemansang pelajar tumu nembiak mit nya pesaka ke berega ti ulih mantu nempa modal mensia enggau pemanah ulah nembiak mit.
“Tu nyata iya nya lebuh Kepala Menteri udah mantaika beberapa rintai berita manah dalam Bajet 2020 nengeri kena 4 November tu tadi sentang tuju nya.
“Pekara nya nyengkaum Perintah Sarawak udah ngemendarka agih belanja RM16 juta dikena neruska taun kedua ba pengawa bejalaika Geran Ninting Taun Khas (GTK) ungkup Institusyen Pelajar Tumu Anak Mit (IPAKK) ti ngerejista di Sarawak enda ngira sekalika instituensyen nya ari baruh perintah besai tauka perintah nengeri,” ku iya.
Iya madah munyi nya lebuh bejaku ba pengerami Konvokesyen SeDidik Zon Kuching Ke-28, 2019 ti bisi 98 iku nembiak mit ke beumur enam taun ari 17 palan Tadika SeDidik Zon Kuching nerima setipikit tembu sekula ditu, kemari.
Nitih ku Fatimah, sekumbang GTK udah ditumbuhka kena taun nyin tadi, perintah Sarawak ngungkupka belanja sepenyampau RM16 juta ngagai IPAKK ti berejista lalu tetiap institusyen bisi nerima RM5,000 dikena bejalaika aktiviti sida.
Geran nya ku iya, ulih dikena nyendiaka pemakai ke manah sereta bepengerai, bejalaika pengawa dalam nyendiaka pelajar ti rindang (fun learning), pemansang profesional pengajar enggau aktiviti ti bisi ngaul apai indai.
“Ari agih belanja RM16 juta ba taun tu, kitai meda bisi pemayuh 27,620 nembiak mit ari 1,118 prasekula Opis Pelajar Nengeri Sarawak (JPNS) bulih pemaik ari GTK nengah belanja RM5,590,000.
“Berebak enggau nya, bisi 20,777 iku nembiak mit ari 1,113 Tabika Opis Pemansang Raban Bansa (KEMAS) Nengeri Sarawak lalu 3,292 iku nembiak ari 176 IPAKK Opis Penyerakup Menua enggau Intergrasi Nasional (JPNIN) nerima pemaik GTK nengah bantu sepenyampau RM5,565,000 enggau RM880,000,” ku iya nerang.
Iya nambah, bantu ti diberi ngagai IPAKK ari baruh ejensi perintah besai sepenyampau RM12,035,000 tauka 75.22 peratus.
“Ungkup tadika peribit, perintah Sarawak bisi meri bantu tu laban sida mega ngembuan pangku pengawa ke berat dalam meri pelajar tumu nembiak mit. Bisi 28,310 iku ari 503 iku nembiak mit nerima pemaik GTK nengah bantu RM2,515,000.
“Pia mega, Biro Servis Pelajar Kaunsil Pengarap Islam Sarawak (BPPMIS), bisi 306 iku nembiak ari 29 palan Tadika nerima GTK ari bantu RM145,000. Nangkanka nya, SeDidik bisi 2,107 iku nembiak ari 82 palan Mutiara enggau Perdana SeDidik nerima pemaik GTK nengah agih belanja RM415,000,” ku iya.
Dalam Bajet Nengeri 2020 nya, Fatimah madah, Kepala Menteri ngungkupka agih belanja RM20 juta kena taun 2020 dikena ngambi 100 buah Tadika enggau Taska SeDidik.
“Agih belanja tu dikena ngenegap enggau ngangkatmanah Pemansang Tumu Nembiak Mit ngambika ulih nyungkak pemansang Sarawak.
“Tu berita manah ungkup SeDidik ke alai agih belanja tu endang tentu deka meri pemaik ngagai 100 buah Tadika enggau Taska SeDidik kena taun 2020 dibanding ari taun ke dulu sepenyampau 82 buah palan lalu penyampau nembiak mega nambah ari 2,250 iku ngagai 3200 iku orang.
“Kitai ngarap Tadika enggau Taska SeDidik tu deka nyadi palan ti keterubah dipilih apai indai dalam juluk dekaka palan nya nyadi palan pelajar tumu nembiak mit ti bekualiti,” ku iya.