PBK Miri asa ati perintah besai nginsil tiga projek jematan di Sarawak
MIRI: Parti Bumi Kenyalang (PBK) Pampang Miri asa enggau pemutus perintah besai nginsil tiga projek jematan di Sarawak, madahka Menteri Kereja Raya, Baru Bian baka ke nadai beratka guna rayat Sarawak.
Pengari ke bejaku parti nya, Leslie Tang madah parti nya mega enda setuju enggau penerang Baru Bian, ke mega ADUN Ba’Kelalan, bekaul perintah besai nadai belanja dikena bejalaika tiga projek jematan nya.
“Ketiga iti projek jematan nya udah dikinsil ketegal penanggul ari sukut belanja lalu tu enda setipak nitihka penerang Pakatan Harapan (PH) ti madah sida lebih manah ari Barisan Nasional (BN) laban Sarawak nadai pemujur mai pemansang kedeka rayat sebedau tu,” ku iya.
“Enti amat bisi penanggul ari sukut belanja, nama kebuah agi bisi ripot ti bekaul mayuh projek udah dikemendar di Semenanjung Malaysia?”
“Nyadi Menteri Kereja Raya, iya tentu ulih meda pemaik projek jematan nya ungkup Sarawak enggau rayat nengeri tu, ukai nya madah penanggul ari sukut belanja ti ngujungka projek nya dikinsil,” ku iya ba siti penerang ditu, kemari.
Ku Leslie agi, laban menteri ti megai tanggungpengawa infrastruktur, Baru Bian patut ngemendarka semua projek pemansang ke patut enggau lengkas dipejalaika lalu enda tetangguh ungkup Sarawak.
“Kelewatan dan pembatalan projek-projek pembangunan dari segi infrastruktur, sekolah dan klinik menyebabkan rakyat Sarawak sangat kecewa apatah lagi negeri ini merupakan penyumbang utama hasil minyak dan gas negara,” katanya.
“Projek pemansang ti dikinsil enggau tetangguh ari sukut infrastruktur, sekula, klinik ngujungka rayat Sarawak asa tambah mega nengeri penyungkak pemadu besai ba asil minyak enggau gis menua,” ku iya.
Iya ngelalau Baru Bian ngambika meruan ingat ke status Sarawak ti nyadi kaban kunsi enggau Semenanjung Malaysia, ba baruh Sempekat Malaysia 1963 (MA63).
“Penanggul ari sukut belanja ukai chara dikena nginsil projek pemansang di Sarawak.
“Taja pia, Sarawak patut bisi pemansang ke sama bela ari sukut infrastruktur, sekula enggau klinik baka di Semenanjung Malaysia. Endang enda masuk akal enggau bebida enti nitihka MA63 sema Perintah Besai ngemendarka projek di Semenanjung Malaysia tang nginsil projek pemansang di Sarawak” ku iya.
“Enda nyata perintah Barisan Nasional (BN) sebedau tu tauka perintah Pakatan Harapan (PH) ke diatu besedia ngemerat ke Sarawak. Agih Belanja Pemansang enda disediaka tauka dikemendarka sebela entara Sarawak enggau Semenanjung,” ku iya nerang.