‘Bintang Kids Obstacle Race 1.0’ PIBG SK Jalan Bintang nerima sambut ke manah

MIRI: ‘Bintang Kids Obstacle Race 1.0’ ti keterubah diatur Gerempung Apai Indai enggau Pengajar (PIBG) Sekula Primari (SK) Jalan Bintang, ditu nerima sambut ke manah ari bala nembiak.

Aktiviti ke diatur ba pantai Luak Esplanade nya pengawa belanda ‘berhalangan’ ke alai nembiak nguji diri napi bemacham pemar sepemanjai sida belanda dikena nentuka penau enggau tikas penyulut diri empu.

Kelimpah ari nya, aktiviti tu dikena ngangkatka pengeregas enggau nempa runding ke manah ba bala nembiak ke alai nya diatur sebagi ari aktiviti ujung taun nembiak pengudah tembu napi peresa Ujian Penilaian Sekolah Rendah (UPSR) bedau lama udah.

Aktiviti tu dipenyadi enggau dikemataka kepala sekula nya empu, Ahmad Othman. Aktiviti belanda tu dibagi ngagai tiga kategori iya nya A – nembiak Primari 5 enggau 6) penyauh 3km sereta 15 iti poin.

Kategori B, ungkup Primari 3 enggau 4 penyauh belanda 2km nengah 15 iti poin.

Ba kategori C, nembiak Primari 1 enggau 2 nyengkaum nembiak Kelas Pelajar Khas mandangka penyereta pemadu mayuh kelebih agi nembiak Primari 2, belanda penyauh 1km sereta 10 iti poin.

Berebak enggau nya, Muhd Fadrul ari kelas 5H enggau Danielle (5P) udah champion kategori A (11 enggau 12 taun) lelaki sereta indu lalu rikod pengelaju iya nya 22 minit enggau 23 minit.

Pia mega, Muhd Adeeb (5E) enggau Andriana Paulina

(5P) bulih lumur dua kategori sama lalu Farid Irsyad (5E) sereta Wong Ai Ling (5L) ketiga.

Ba kategori B (9 enggau 10 taun), champion iya nya Saiful Iman (Tim Sifu)enggau Nur Aishah (4E), nengah rikod pengelaju 16 minit enggau 19 minit.

Ungkup penuduk lumur dua kategori ke sama pulai ngagai Christopher Jau (4E) enggau Davina Bulan (4P), lalu ketiga iya nya Mohd Hezzrul (4H) enggau Nur Hana Raisha (4P).

Kategori C (7 enggau 8 taun), champion lelaki enggau indu iya nya Hamzah (Tim Sifu) sereta Nur Qalesya (2P). Kededua udah nembuka pelanda enggau rikod pengelaju iya nya 8 minit aja.

Nangkanka nya, champion kategori ke sama, diempu Alexander Balan (2H) enggau Numa Alveena (2P) lalu ketiga iya nya Hadif Syameer (Tim Sifu) enggau Nurtris Qistina Shafeeya (2P).

Kesemua tiga pemenang pemadu tinggi ari tetiap kategori enggau pesereta ke mujur nembuka belanda sida nerima perais enggau midol ti disuaka kepala pengajar sekula nya.

Aktiviti tu dikemataka bala apai indai ke bisi datai meri sukung moral ngagai anak sida.

NINGA BATANG PENGAWA: Sekeda ari apai indai enggau pengajar ke datai ba pengerami ‘Ramah Mesra’ PIBG SK Sebangki nya.

GAGA: Pesereta rindang lebuh eksesais sebedau berengkah belanda.

BESEDIA: Bala pesereta benung besenam sebedau belanda.

PAGAR: Pesereta nengah poin seraya dikemata bala kordinator khas ke meri ajar nengah pagar nya.

KETERUBAH: Bala pesereta mansa poin ti keterubah.

TETAP KERING: Pesereta diberi beledi ke bisi pasir, ti patut dibai belanda nengah nya.

TEMBU: Pesereta ke mujur nembuka pelanda iya nya, Muhammad Shahrul Amir, nerima midol ari kepala pengajar Ahmad Othman.