Peransang bala anak ngambika ransing nyereta aktiviti lumba enggau main

SELANGAU: Apai indai dilalau ngambika meransang bala anak sida ransing agi nyereta ba aktiviti lumba enggau main di sekula.

Exco Raban Nembiak Parti Rayat Sarawak (PRS) Kunsilor Hendry Kanyan Vincent Rawing madah laban pengering batang tubuh ulih meri pengeregas ngagai untak anak sereta meri empas positif ba prestasi akademik sida.

“Anang nagang bala anak enti sida ransing ba pengawa lumba enggau main. Beri peransang enggau sukung ngambika ulih nyungkak ba penyulut sekula sida dudi hari ila,” ku iya nerang maya bejadi

‘Kejohanan Sukan Tahunan’ Gerempung Apai Indai enggau Pengajar (PIBG) Sekula Primari (SK) Penghulu Imban di Sekuau ensanus.

Ku iya, perintah nengah Opis Menteri Nembiak Lumba enggau Main (KBS) komited merambu enggau bejalaika mayuh bengkah aktiviti sereta polisi ti bekaul pemansang raban nembiak, lumba enggau main lebih agi ngagai nembiak sekula.

“Tu seriris enggau Pelin Pemansang Pelajar 20132025 ke mega numpuka ngagai pemansang modal mensia ngambi nembiak kitai sama tikas enggau menua maju ke bukai di dunya.

“Aku pechaya komuniti pelajar tauka nembiak sekula ti bepengerai, regas enggau bedisplin ulih mantu ba prestasi sereta ngangkatka produktiviti diri enggau menua,” ku iya.

Nitihka iya, Kompeni Paku Lalai Resources Sdn Bhd ti diketuaika iya empu deka merambu mayuh agi program inisiatif tanggungpengawa rama korporat (CSR) unngkup SK Penghulu Imban dudi hari ila.

Berebak enggau nya, Henry Kanyan mega bisi nyuaka bantu ari Gerempung Pemansang Sitak Batang Oya ngagai SK Penghulu Imban.

Pia mega, kilah malam iya bisi bejadika Pengerami Malam PIBG SK Penghulu Imban.

Sama bisi datai iya nya Kepala Pengajar SK Penghulu Imban Andrew Sirai Benang, Yang Dipertua PIBG SK Penghulu Imban Henry Mantok enggau Penghulu Andrewson Ngalai Asom.

RICHAH:HenryKanyan(duduk, dua kiba) begambar enggau bala temuai ke datai maya Pengerami Makai Malam PIBG SK Penghulu Imban. Bisi mega dipeda (ari kiba) Henry Mantok, Andrewson Ngalai enggau Andrew Sirai (kanan).

BEJADI: Henry Kanyan malu tawak kelai bejadi pengerami ‘Kejohanan Sukan Tahunan’ PIBG SK Penghulu Imban seraya dikemata Andrew Sirai(kanan) enggau Henry Mantok (tengah).

MERI JAKU PENGELALU: Henry Kanyan maya bejaku bejadi pengerami‘Kejohanan Sukan Tahunan’ PIBG SK Penghulu Imban di Sekuau ensanus.

MERI BANTU: Henry Kanyan (dua ari kiba) nyuaka bantu ari Gerempung Pemansang Sitak Batang Oya ngagai Andrew Sirai seraya dikemata Henry Mantok (kiba).