TPU UPMKB deka ngatur Kus Ngasilka Baja Organik kena 16 November
BINTULU: Taman Pertanian Universiti (TPU) Universiti Putra Malaysia (UPM) Kampus Bintulu deka ngatur Kus Ngasilka Baja Organik, Baja Foliar sereta Efektif Micro-Organisma (EM) enggau chara komersial ari pukul 8 pagi ngagai 5 lemai kena 16 November (Hari Enam) ba Dewan Taklimat Bangunan Pentadbiran dan Latihan Praktikal ba Unit Hortikultur enggau Bangsal Kompos TPU UPMKB.
Pemesai Opis Betanam Betupi Kanan TPU UPMKB ke mega pengatur kus Sat Maling madahka,kus nya siti ari chara mansang ke mua dikena meri peluang ngagai pesereta ke deka ngambi bagi dalam pengawa ngaga baja ngena organik sekalika ungkup diri empu tauka diguna ba pekara bukai.
Ku iya, program nya dipelaba nerima sambut ke manah kelebih agi bala ari pengemeran industri baja laban nya ulih nyungkak penatai pemisi ke tinggi ungkup pengeluar baja organik.
“Pengawa ngasilka baja tu enda begunaka modal ti besai, kelimpah baja tu murah sereta likun dibanding baja kimia ke bukai,” dalam penerang iya ditu bedau lama ti udah.
“Tu nyengkaum ba pekara milih perengka tauka barang pemun, chara ngenyampatka proses ngaga kompos mega bisi diajar, nemu sereta belajarka teknik ngaga baja ai (foliar) enggau Efektif Mikro-Organisma (EM) nyengkaum ba pengawa mungkus sereta meri chap.
“Bekunsi penemu sentang pemar ti ditapi, pengawa ngeluar enggau gaya ti bekaul enggau pengawa ngaga baja organik mega bisi diatur,” ku iya nambah.
Nya alai, iya ngarapka mensia mayuh enda muai peluang nyereta kus nya laban bayar kus tu enda mar lalu tu bisi nyengkaum pemakai, setipikit penyereta enggau bup kus.
Pom ngerejista kus ulih diambi ari laman rasmi www.btu.upm.edu.my lalu hari bulan kepenudi ngerejista kus kena 14 November 2019 (Hari Empat). Penerang
ke silik agi sentang kus tu ulih dikenatai terus ngagai Mohamad Nasri (086-855667), Dennis Len Gouk (0198145824), Khalid Nawi (011-18847127), Suzalin Sigar (019-8483337) tauka nganjung nengah faks ke lumur 086855283.
Batang tuju ke bukai bekaul kus tu iya nya deka meri peneleba ngagai pesereta sentang penemu ari sukut perengka ke diguna dikena ngaga baja organik, utai ti dipilih enggau perengka ti disedia
Baka amau kayu, tai manuk tauka chapi ti agi baru, molases, gula, Efektif Mikro-Organisma (EM), kapur, sekau padi, teda sayur, teda pemakai, rumput enggau ke bukai.
Kus tu mega dikena pesereta belajarka chara proses ngaga kompos ngambika ulih reput enggau jampat sereta chara ngintu enggau ngemanah ke betul sebedau nyadi baja kompos, chara ngaga bungkus sereta meri chap kompos ke betul kelebih agi dikena ngaga kompos nengah chara komersial.
Pesereta deka belajar penemu pemun dalam pengawa ngaga baja kompos lalu ulih ngaga nya kediri di rumah, nurseri enggau ke bukai ngambika enda kelalu bepanggai ba baja kimia di pasar ti mar ungkup ke guna diri empu.