MP PH enda mujur, bebendar ngetanka Sarawak
Presiden Parti Sa’ati Rayat Sarawak (SUPP), Dato Sri Dr Sim Kui Hian madahka kaban parlimen (MP) Pakatan Harapan (PH) enda mujur sereta bebendar ngetanka Sarawak.
Ngambi chukai dagang lima peratus ba produk petroleum nyadi ke chuto, Dr Sim madahka kompeni Shell enggau Murphy udah mayar chukai nya tang Petronas enda mayar.
Berindik ari nya iya mega nanya nama kebuah kaban parlimen PH Sarawak nadai negika pekara tu ke pemaik Sarawak.
“Perintah PH mega terus ngenusahka nengeri Sarawak.
“Nama kebuah Petronas enda mayar chukai dagang lima peratus? Nama kebuah kaban parlimen PH Sarawak enda ngetanka ke kitai?,” ku iya nanya lebuh Aum Delegasi Ninting Taun SUPP ba Indu Opis SUPP ditu kemari.
Berati ke pekara tu, Dr Sim ke mega Menteri Pengawa Berumah enggau Kaunsil Kandang Menua ngansak rayat Sarawak ngambika enda mudah dikeruga runding enggau strategi propaganda PH tu.
Ku iya, kenyau ari megai Putrajaya sepengudah menang maya pengawa bepilih besai 2018, perintah PH dipeda majak ngena ‘gear surut’.
“Sida madahka UEC (Unified Examination Certification) deka dituku enti sida nyadi perintah. Tang diatu?
“Sida besemaya pengidup rayat deka nyadi manah agi pengudah ngetuka Chukai Barang enggau Servis (GST), tang semua tu enda nyadi nyata,” ku iya.
Dr Sim mega madahka komitmen SUPP ti bebendar ungkup rayat Sarawak.
“SUPP iya nya parti politik ngembuan pupu bansa ti keterubah ba Sarawak lalu enti nadai sukung ari rayat sereta bala kaban parti, parti tu enda tegap nyentukka diatu.
“Kami bebendar ngetanka rayat Sarawak sereta ukai ungkup diri empu. Kami beterima kasih ba sukung sereta pengandal ti udah dilempaika tu,” ku iya.