Perintah nengeri bebendar deka mantu rayat nyukat tanah NCR
Ari baruh pegai GPS, pengawa nyukat tanah ngena inisiatif baru endang dikemerat perintah nengeri: Abang Johari
BAU: Perintah nengeri ti dipegai Gabungan Parti Sarawak (GPS) chukup bebendar deka mantu rayat ba pengawa nyukat tanah adat bansa asal (NCR) ngena inisiatif baru di nengeri tu.
Kepala Menteri Datuk Patinggi Abang Johari Tun Openg madahka, dalam perambu belanja 2020 perintah nengeri ngungkupka RM40 juta dikena bejalaika pengawa nyukat kelingi tanah NCR.
Lalu ku iya mega, dikena nentuka inisiatif baru nya mujur perintah nengeri nengah Opis Tanah enggau Survei (JTS) begunaka kerejasama rat ari raban bansa enggau pengari rayat.
“Aku minta kerejasama ari semua bansa enggau pengari rayat, lebuh tim nyukat tanah datai deka nyukat tanah NCR kita patut bisi enggau nyempulang sereta mantu pengawa nya.
“Enti bisi kerejasama ti baka tu dia pengawa nya deka jampat dipejalaika sereta tanah nya ulih mega jampat dikemansangka. Kitai ulih ngemansangka sektor betanam betupi.
“Perintah GPS kami
chukup bebendar ba pekara tu sereta dalam perambu belanja 2020 bisi RM40 juta diungkupka dikena bejalaika pengawa nyukat tanah tu,” ku iya.
Abang Johari mansutka pekara nya lebuh iya bejaku seraya bejadika pengerami nyuaka geran tanah Seksyen 18 Kanun Tanah Negeri ti diatur nyerumba Pengerami Pemesai Begulai Enggau Rayat ti diatur ba Dataran Bazaar Krokong ditu, kemari.
“Kami (perintah) nadai deka ngambi tanah kita (rayat), enti deka ngaga baka sekula, jalai alun baru meh ngambi tang tanah ke diambi nya dipampas,” ku iya.
Nyerumba pengerami nya kemari Abang Johari diberi basa nyuaka sepenyampau 579 surat pala tanah Seksyen 18 kanun Tanah Negeri ti keguna endur diau ke disukat nengah Program Pengukuran Kampung Tradisional enggau ke guna betanam betupi ti disukat dalam Kandang Pemansang Tanah SALCRA ngagai 827 iku pengempu tanah NCR.
“Nengah Program Pengukuran Kampung Tradisional, penerima surat pala tanah seharitu iya nya ari Kampung Suba Bau; Kampung Suba Buan; Kampung Suba Bandar; Kampung Tasik Biru; Kampung Skiat Lama enggau Kampung Skiat Baru.
“Lalu Kandang Pemansang Tanah SALCRA, pesereta dalam estet kelapa sawit ti nerima surat pala tanah seharitu iya nya ari Estet SALCRA
Bratak; Estet SALCRA Jagoi; Estet SALCRA Stenggang enggau Estet SALCRA Undan.
“Pengawa nyukat tanah NCR tu dipejalaika Opis Tanah enggau Survei enggau kerejasama Dayak Bidayuh Nasioanal Association (DBNA), kitai chukup beterima kasih,” ku iya.
Nambahka nya Abang
Joahri mega bisi nyuaka sepenyampau 473 lot ti mungkur enam buah Kampung tauka genturung pendiau ngagai pengempu tanah.
Kelimpah ari nya Abang Johari nyerumba pengerami pemesai begulai enggau rayat, iya mega bejadika bup ‘The Blueprint For Bau District 2016-2030’.
Lebuh ke ngenang pekara nya, iya madahka perintah nengeri deka ngemansangka menua Bau bepelasarka pekara ti udah diperambu dalam bup ‘Blueprint’ nya ti deka dipejalaika nengah Langgur Pemansang Malaysia Lumpar Ke-12 (RMK-12).
“Aku setuju seagi GPS bisi kuasa, kitai deka ngemansangka Bau bepelasarka ‘The Blueprint For Bau
District 2016-2030’, ti sepenyampau RM500 juta, ti deka digaga ari baruh RMK12.
“Tang pengawa ngemansangka Bau tu ngelui ari taun 2021, timpuh kitai (perintah GPS) deka abis ba taun 2021, nya alai rayat nentuka (maya bepilih ila),” ku iya.
Nambahka nya, Abang Johari mega bejadika GPS Zon 4A dikena ngenegapka agi GPS.
“Kita udah nemu nama kebuah kitai numbuhka GPS laban kitai nemu dalam sejarah kitai dalam 56 taun kita dalam Parti perikatan lalu udah nya Barisan Nasional, lalu kitai udah belajar ari nya.
Sama bisi datai ba pengerami nya kemari Sapit Kepala Menteri Datuk Amar Douglas Uggah Embas, Menteri Pelajar, Sains enggau Pemansik Teknologi Dato Sri Micheal Manyin Jawong, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Kaban Kunsil Nengeri (ADUN) Serembu Miro Simoh, ADUN Tasik Biru ti mega Chairman GPS Zon 4A Dato Henry Harry Jinep, Direktor JTS Abdullah Julaihi enggau ke bukai.
Aku minta kerejasama ari semua bansa enggau pengari rayat, lebuh tim nyukat tanah datai deka nyukat tanah NCR kita patut bisi enggau nyempulang sereta mantu pengawa nya.
Datuk Patinggi Abang Johari Tun Openg
Kepala Menteri