Kepala Menteri sedia berunding bekaul nambah kemisi Hari Krismas
BAU: Kepala Menteri Datuk Patinggi Abang Johari Tun Openg sedia berunding deka nambah sehari agi kemisi Hari Krismas ungkup nengeri tu.
Iya madahka pekara nya mega ulih dikerunding nyema nadai agi agih dalam gazet.
“Enti deka minta kemisi tambah Hari Krismas kitai patut dulu meda agih dalam gazet (kemisi). Laban kemisi mesti digazet.
“Nyema agi bisi puang ba agih (kemisi) dalam gazet nya kitai ulih meri, enti nadai kitai ulih berundingka nya.
“Aku enda ulih ngaga pemutus seharitu (kemari) laban kitai bepelasarka undang-undang ba pekara tu. Gabungan Parti Sarawak (GPS) nitihka undang-undang,” ku iya.
Abang Johari madahka pekara nya maya iya bejadika pengerami nyuaka geran Tanah Seksyen 18 Kanun Tanah Negeri, bejadika Gabungan Parti Sarawak (GPS) Zon 4A enggau bejadika bup ‘The Blueprint For Bau District 2016-2030’ ti diatur nyerumba Pengerami Pemesai Begulai Enggau Rayat ti diatur ba Dataran Bazaar Krokong ditu, kemari.
Berebak enggau tu Abang Johari madah berita ti dikerembaika ba aplikasi WhatsApp ensanus ti madah iya ngemendarka kemisi tambah Hari Krismas kena 24 Disember tu iya nya berita enda betul.
Di Sabah apin lama, Kepala Menteri iya Datuk Seri Mohd Shafie Apdal madahka Sabah deka kemisi Hari Krismas dua hari iya nya 24 enggau 25 Disember.
Sama datai ba pengerami nya Sapit Kepala Menteri Datuk Amar Douglas Uggah Embas, Menteri Pelajar, Sains enggau Pemansik Teknologi Dato Sri Micheal Manyin, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Kaban kunsil Nengeri (ADUN) Serembu ti mega Tuai Rumah pengerami nya Miro Simoh sereta ADUN Tasik Biru ti mega chairman GPS Zon 4A Dato Henry harry Jinep enggau ke bukai.