Pengawa ngemunka GPS Zon 4A kelai penegap GPS megai Sarawak
BAU: Pengawa bejadi Gabungan Parti Sarawak (GPS) Zon 4A ulih ngenegapka agi GPS ngiring sereta megai Sarawak.
Kaban Kunsil Nengeri (ADUN) Serembu Miro Simuh madahka pengawa bejadika GPS Zon 4A ti mungkur Kunsil Nengeri (DUN) Opar, Tasik Biru, Serembu enggau Mambong chukup signifikan enggau pemansang politik diatu.
Suba kitai meda lambang bukai, tang sehari tu siti lambang ti terebai tegap nya mih lambang GPS burung kenyalang kitai, ku iya.
“GPS iya nya parti ti chukup tegap ba nengeri Sarawak tu, enda kala belaya enggau pangan diri taja pan dalam nya (GPS) bisi empat parti komponen.
“Kitai (GPS) bisi penyayau sereta ulih nerima penemu pangan diri tauka bisi ulah bebatak asur enggau pangan diri. Tu mih penyelai tauka pengelebih GPS,” ku iya.
Miro ti nyadi Sapit chairman 1 GPS Zon 4A mansutka pekara nya dalam jaku pengelalu pengerami bejadika pengawa nyuaka geran tanah Seksyen 18 Kanun Tanah Negeri, bejadika bup ‘The Blueprint For District Bau 2016-2030’ enggau bejadika GPS Zon 4A nyerumba Pengerami Pemesai Begulai Enggau Rayat ti diatur ba Dataran Bazaar Krokong ditu, kemari. GPS Zon 4A nya kemari dipenyadika Kepala Menteri ti mega Chairman GPS Datuk Patinggi Abang Johari Tun Openg.
Bejaku baru Miro madahka GPS patut ti datai ari nengeri Sarawak sereta diketuai enggau diiring peranak Sarawak.
Ku iya, GPS iya nya siti parti ti negika hak anak Sarawak.
“Kitai arap bendar nengah GPS tu meh kitai ulih bediri enggau temegah sereta tegap negika hak Sarawak.
“Ngarapka pekara ti ditegika YAB Kepala Menteri enggau bala pemesai ulih terus ngetanka hak Sarawak ti udah enda dikemeratka,” ku iya seraya mai raban bansa menua Bau sereta serata Sarawak ngambika meri sukung ngagai Kepala Menteri negika hak nengeri tu.
Bisi datai ba pengerami nya kemari, Sapit Kepala Menteri Datuk Amar Dougals Uggah Embas, Menteri Kaunsil Kandang Menua enggau Pengawa berumah Dato Sri Dr Sim Kui Hian, Menteri Pelajar, Sains enggau Pemansik Teknologi Dato Sri Michael Manyin Jawong, enggau pemesai ke bukai sereta ADUN Tasik Biru tu mega nyadi Chairman GPS Zon 4A Dato Henry Harry Jinep, ADUN Mambong Datuk Dr Jerip Susil enggau ke bukai.