Lapan komponen dilanggur dalam bup ‘The Blueprint For Bau District 2016-2030’
BAU: Bisi lapan komponen diperambu sereta dikemeratka dalam bup ‘The Blueprint For Bau District 2016-2030’ dikena nyaup Sarawak nuju nyadi nengeri mansang ba taun 2030.
Kaban Kunsil Nengeri (ADUN) Tasik Biru, Dato Henry Harry Jinep madahka bup ‘Blueprint’ nya nyadika lalau dalam pengawa ngelangkar pemansang pelilih menua Bau dalam Langgur Pemansang Malaysia Lumpar Ke-12 (RMK12) ti bepelasarka polisi pemansang Sarawak.
“Seharitu nyerumba genap 88 taun opis pelilih menua Bau, ‘The Blueprint For Bau District 2016-2030’ dipenyadika sereta bup Blueprint tu nyadi roadmap kami ba pelilih menua bau ngelanggur pemansang.
“(Ba bup tu) Bisi lapan kompnen ti diperundingka dalam perambu iya nya fasiliti enggau infrastruktur;pengawa berumah enggau reta tanah; dagang temuai, seni enggau main asal; lumba enggau main; betanam betupi; pemansang modal mensia; bekaul enggau tanah, penumbuh pemeranak puku enggau industri.
“Di pelilih menua Bau kami enggai semina nitih aja tang kami empu deka ngatur pemansang ti dikedeka ba kandang menua kami.
“Kami enggai orang datai lalu madah ke kami tu nama ke patut dikereja tang kami di Bau deka madah ngagai ketuai nama ti dikearap enggau nama ti dikedeka kami. Nya kebuah Blueprint tu ditumbuhka,” ku iya.
Henry ti mega Chairman
GPS Zon 4A mansutka pekara nya dalam jaku pengelalu pengerami bejadika pengawa nyuaka geran tanah Seksyen 18 Kantun Tanah Negeri, bejadika GPS Zon 4A enggau bejadika bup ‘The Blueprint for Bau District 2016-2030’ nyerumba pengerami Pemesai
Begulai Enggau Rayat ti diatur ba Dataran Bazaar Krokong ditu, kemari.
Bup ‘The Blueprint for Bau District 2016-2030’ nya kemari dipenyadika Kepala Menteri Datuk Patinggi Abang Johari Tun Openg.
Bejaku baru Henry madahk bup nya enda dipenyadika ba taun 2016 berindik ari sida iya di pelilih menua Baru mansik dulu polisi perintah enggau kuing pemansang nengeri ari baruh iring Kepala Menteri.
Nitihku iya bup nya nyadi asil ari perambu enggau runding seraban orang pandai peranak Bau.
“Kenyau dua taun ke udah, kitai udah ngasaika perambu belanja ti besai. Nengah perambu belanja ti holistik nya kamideka sereta besedia meri kerejasama ngagai pemesai
GPS,” ku iya.
Dulu ari Henry madahka empat taun ke udah mayuh projek pemansang udah nyadi nyadi di Bau entara iya baka beberap projek jematan, Tebing Ai Siniawan, Kompleks Pejabat Daerah Bau, Bau Sport Arena enggau ke bukai.
Pemansang nya entara asil ti nyata dipeda ari baru iring Kepala Menteri enggau Gabungan Parti Sarawak (GPS), ku iya.
Bisi datai ba pengerami nya kemari, Sapit Kepala Menteri Datuk Amar Douglas Uggah Embas, Menteri Pelajar, Sains enggau pemansik teknologi Dato Sri Michael Manyin Jawong, Menteri Kaunsil Kandang menua enggau Pengawa Berumah Dato Sri Dr Sim Kui Hian sereta ke bukai.