Orang autisma patut ulih diterima sama bela dalam komuniti

KUCHING: Kemaya hari tu, isu bekaul autisma ukai agi ba tikas meri penemu ngagai mensia mayuh tang patut ulih diterima komuniti laban autisma tauka sebarang orang ti begunaka bantu khas (OKU) ukai komuniti tauka orang ke nyelai.

Presiden Gerempung Autistik Kuching (KAA), Dato Dr. Yao Sik Chi madah nembiak tauka komuniti autisma begulai sama enggau kitai, udah nyadi sebagi ari komuniti mensia mayuh.

“Nya alai diatu mih maya nya, autisma tu patut diterima kitai lalu semina meri penemu nya patut diketuka. Pengelama kitai di Malaysia tu ari kelia datai ke seharitu, semina meri penemu aja, tang kitai enda ingatka nya udah chukup masau timpuh nya.

“Laban sentang penemu udah chukup dipadah bakani gaya pendiau tauka simptom orang autisma, sereta pengawa nyendia perengka guna kena orang autisma ngelatih diri sereta terapi sida iya pan mayuh udah disediaka.

“Bala apai indai nembiak autisma mega udah tebuka runding deka nganjung anak sida iya berubat tumu, ngambika nembiak autisma bisi peluang ke manah agi ulih belajar pengelandik lalu ngambika sida iya teleba ngereja pengawa kediri empu, bisi pengelandik bejaku, pengelandik rama berandau enggau orang ti begulai enggau sida, lalu mereti agi ke utai ke dipeda, didinga sereta dibacha sida iya,” ku Dr. Yao madah maya dikerandau bedau lama tu tadi.

Ku iya, apai indai kemaya hari tu pan nemu ngiga sekula tauka palan ke tau alai anak autisma sida dianjung besekula tauka dilatih, ngambika sida ulih sama begulai enggau nembiak normal bukai lalu sama belajar nitihka silibus akademik sekula endar ba atas pengulih kognitif sida iya.

“Apai indai diatu enda kakang ati nganjung anak sida iya dilatih ba palan vokasional ngambika sida (nembiak autisma) bisi pengidup ke menyana, ngulihka belanja kediri empu sereta ngasaika diri empu ulih diterima dalam komuniti baka orang bukai.

“Komuniti kitai sigi nyukung palan ke bisi nyendiaka pengawa latih sereta terapi ke nembiak autisma ari sukut belanja sereta pengawa ngintu diri.

“Lebuh kitai bejuraika isu autisma ti patut diterima tu, aku nyemaka siti penemu bakatu, iya nya lebuh nembiak autisma nya temu ringat lalu ngerijat ba mua orang mayuh ba palan bebelika barang tauka ba restoren, mensia mayuh mereti sereta bisi ngembuan penyinu ba apai indai nembiak autisma nya, ari sida iya ti nyalahka apai indai laban ngumbai apai indai ke enda ngajar anak sida nya,” ku iya.

Dr. Yao, ti mega kala nyadi direktor Opis Pengerai Sarawak entara siku orang ke siru endar enggau isu bekaul autisma laban anak iya empu ke berumur 38 taun, bisi autisma ari mit, lalu ke ngasuh seduai melaki bini balat kiruh enggau pengawa Gerempung Ukai Dikuasa Perintah (NGO) bansa tu, kelimpah ari nya iya mega siku lutur sereta deka mantu apai indai bukai ke bisi ngembuan anak autisma.

Berebak enggau nya, iya madah bala pengajar mega patut dilatih dalam pelajar ke endang ungkup kena nembiak autisma, lalu ngelalau perintah ngaga mayuh agi sekula ungkup nembiak autisma ke bisi ngajar pelajar tauka pengawa latih ke patut dipelajar sida iya.

“Dalam sebuah kelas bansa nya, patut bisi siku penulung pengajar ke bela mantu pengajar dalam kelas nya. Pelajar ke insklusif patut diperansang ba sebarang palan ke ngena ngambika nembiak autisma ulih ngemansangka pengelandik rama sida iya, lalu baka nya mega nembiak bukai ke normal pan mereti agi ke pendiau nembiak autisma.

“Lalu baka nya mega enggau palan nyeridi anak mit, mayuh agi pengajar patut dilatih bakani chara nyaga sereta ngajar nembiak autisma pra-sekula lalu palan nya pan enda tau enda nerima nembiak autisma direjister ba sekula nya,” ku iya.

Taja pia, iya madah perintah ngembuan tanggungpengawa ke besai kelebih agi dalam pengelantang pendiau komuniti ke begunaka bantu khas bansa tu.

“Perintah mega patut meri geran ngagai gerempung tauka palan alai nembiak autisma ngelatih diri empu ari renggat pra-sekula ngagai sekula primari, lalu baka nya mega enggau terapi pengelandik sereta terapi chara bejaku patut bisi disediaka ba klinik perintah di tetiap pelilih menua,” ku iya.

Chara ngubat nembiak autisma ba renggat instervensyen tumu ukai semina ngarapka palan autisma aja lebuh nembiak nya dianjung terapi tauka maya intervensyen, tang lebuh sida masuk renggat sekula sekondari, sida iya enda tau enda dianjung belajar pengelandik, nya alai ku Dr. Yao, senentang pekara tu, perintah patut muka mayuh agi palan vokasional ngambika bisi endur sida iya belajar pengelandik.

Dr. Yao mega meri penemu bakani ku kitai ulih ngelala enti nembiak nya autisma tauka enda, ke enda tau enda dikemata apai indai nembiak, iya nya ari sukut pengelanchar jaku sida, ulah sida iya ke enda normal lalu enti sida iya bejaku pan sida suah nandu jaku tauka randau sida, enggai bekunsika utai ke dikerindu sida iya, enggai malik ngagai mata orang ke bejaku enggau sida, lubah mansang sereta mereti pasal kaul begulai enggau pangan diri.

Sekeda ari ulah bukai mega nyengkaum enggau begulai enggau orang, nandu ulah ti digaga sida, enda mudah nukar pengawa ke seruran digaga sida iya enggau chara baru sereta sekalika kelalu sensitif tauka enda ba sekeda pekara.

Iya nandu baru madahka, dalam tiap profil autisma, urung siku nembiak dalam 68 iku nembiak bisi autisma, lalu autisma nyadi enda ngira pupu bansa, tauka sosioekonomi mensia mayuh. Tang enti beratika statistik, urung 4.5 kali ganda autisma nyadi ba nembiak lelaki ari indu, lalu tu mandangka pemalat komponen genetik tu.

Kelimpah ari nya, sebuah palan di Kuching ke dikelala enggau nama KAA, endur nembiak autisma dilatih sereta diajar pengawa latih nyerumba sebuah sekula vokasional, urung 200 lebih nembiak autisma dianjung apai indai sida kia nitihka jam, lalu dia meh sida iya diajar mayuh macham pelajar baka kraf jari, seni tauka pengelandik ngidupka diri.

Lebuh ngelawa palan nya di Taman Desa Wira, ke diulu Koordinator Program, Cheryl Chong, iya mai raban pengarang berita meda pengawa ngaga asil pengelandik jari siku nembiak autisma. Nitih ku Chong, semua asil pengelandik jari ngaga marik nya deka dijual ba pengawa bejual pengasih (charity sale) tauka orang tau ngaga peminta nitihka peneka sida, lalu ari asil dagang nya, nembiak nya bulih komisyen.

“Pengawa latih vokasional enda tau enda ungkup nembiak autisma, kelebih agi lebuh umur sida iya udah manggai 12 taun. Udah sida abis ba Pom 3, sida iya patut diberi peluang ngerijista diri empu ba sekula vokasional. Ngmbika nemu ba senentang ni pengelandik sida iya mesti dikemansangka.

“Kekadang pengelandik sida tu nyangka dalam musik, kraf jari, komputer, matematik sereta utai bukai. Mayuh ari sida nembiak autisma tu ka agi gawa ba endur ke enda betemu enggau orang, tauka gawa ba woksyop, mungkus barang, ngaga kek, sereta mayuh macham utai bukai. Sekeda sida ke landik agi ba pengawa rama, tau diasuh gawa ba kafe sereta palan bebelika barang tang sida meseti seruran dikemata,” ke iya.

Bedau lama tu tadi, siti forum bekait enggau nembiak autisma bisi digaga di Kuching, alai presiden National Autism Soceity of Malaysia (NASOM), Feilina S.Y. Muhammad Feisol meri penerang ke silik bekait enggau autisma. NASOM udah ditumbuhka dalam kandang 32 taun.

“Pelabaka aku, kitai udah datai ba tikas meri penemu nya udah chukup kelebih agi ba nengeri, diatu kitai patut ulih nerima reti autisma. Ba penemu aku, perintah kitai chukup manah laban sida iya mimit pan enda nulak polisi tu.

“Pemerat ke patut dikibuhka kitai, iya nya tetiap iku anak mit bisi hak sida iya dalam pelajar, lalu tetiap iku nembiak bisi hak ba sukung pelajar ungkup ke sida iya, nya entara pemendar kami ngelama tu. Tang, ke berat agi, apai indai nembiak autisma nya.

“Apai indai enda tau enda nerima, apai indai enda tau enda mai anak autisma sida iya pansut bejalai enggau sida sebilik, ukai ngurung iya di rumah, nya baru komuniti ulih nerima,” ku iya,

Iya madah, kediatu agi mayuh komuniti ke bedau ulih nerima nembiak autisma laban apai indai sida iya matih enda mai anak autisma sida iya betemu enggau orang.

“Diatu pan, apai indai agi nyimpan anak sida iya di rumah laban ‘stigma’. Ambika chunto, enti kita sebilik bisi pengerami ‘kenduri’, apai indai enggai mai anak autisma, nama kebuah bansa nya? Pengerami makai selamat nya enggi kita sebilik, patut mai semua anak kita kia, sekalika iya autisma tauka enda, baru komuniti ulih meri sukung sida iya,” ku iya.

Lalu baka nya mega maya pengerami hari besai baka Taun Baru China, Hari Raya, Gawai Dayak, Krismas, anak autisma disimpan tauka dikurung di rumah aja.

“Nemu nama kebuah bansa nya? Apai indai meri dalih kebuah enda mai laban enggai ke ngachau barang orang endur orang berami nya, tauka sida iya mayuh ulah, tauka manchal. Keterubah nya, bai anak kita pansut ngagai pengerami diri sebilik dulu. Lebuh kita mai sida iya pansut, baru komuniti ulih nerima, nya utai ke disebut enggau nama Nerima,” ku iya.

Taja pia, iya madah di nengeri besai baka Kuching, Kuala Lumpur, Pulau Pinang, komuniti nemu reti autisma tang sida ke diau di menua baka menua pesisir, enda nemu pasal nembiak ti begunaka bantu khas bansa tu laban nadai sukung, sereta nadai orang ke dilatih mutarka anak autisma.

“Ke pengabis berat, iya nya ngelatih sida ke ba baris mua dulu (frontliners) baka pengajar KEMAS, misi di klinik enggau ba sepital. Nyema bisi apai indai nembiak ke nganjung anak sida iya beperesa, semua perengka guna patut udah bisi magang-magang.

“Enti anak mit nya dianjung peresa tumu, lalu lutur pan jampat nemu enti anak mit nya autisma tauka ‘down syndrome’, anak mit nya pan ulih diubat enggau jampat lalu ngemuntangka pengawa anak mit nya nurun sekula jemah ila.

“Taja pia, mayuh apai indai ke enda ngadang, nyau masuk Primeri Satu anak sida iya, baru ninga pengajar madahka enda ulih ngajar anak sida laban ulah iya ke nyelai ari nembiak bukai. Amat pan nembiak nya agi ulih dilatih, nyangka deka ngambi timpuh ke panjai,” ku iya.

Nembiak ke diperesa tumu lalu ditemu autisma, iring embing apai indai chukup berat, laban nembiak autisma ngemataka ulah apai indai sida iya, lalu sida iya jampat nangkap ari nya.

“Sida iya nemu nukar gari kedri empu, nemu ngagai agu kediri, nemu makai ngena sudu enggau garpu lalu landik megai gelas kediri empu. Latih sida iya maya umur sida iya agi biak,” ku iya.

Senentang perengka guna ke nembiak autisma ke bisi digaga orang ba entara semua pasaraya di serata menua Malaysia, semina sebuah aja pasaraya, ke (Autism Friendly Mall), Sunway Putra Mall.

“Tu siti pemansang ke manah, laban manah ke nembiak autisma, lampu sida iya enda terang, nadai musik, lalu sida iya mega bisi sebuah bilik alai mai nembiak autisma nya nyabarka diri nyema iya ngeransi, ke dikumbai ‘Calming Room’.

“Diatu aku deka berandau enggau MAHB (Malaysian Airports Holdings Berhad)ke ngembuan KLIA enggau KLIA2 laban ninga berita MAHB deka ngaga padang bilun nya sama tau alai nembiak autisma. Nya alai, padang bilun kitai keterubah iya nyadi padang bilun ke (autism airport friendly) di Asia,” ke iya.

Kelimpah ari nya, iya madah NASOM gagit endar ati minta perintah ngaga mayuh agi vokasional sereta TVET.

Ku iya, di Semenanjung Malaysia, NASOM bekerejasama enggau Opis Menteri Nembiak, Lumba enggau

Main (MOYS) lalu baruh MOYS, sida iya udah numbuhka 2 buah Palan Pengelandik Nembiak Menua (IKBN) alai palan tu bisi nyendiaka 40 peluang pengawa ke nembiak autisma ke udah ngerijista diri empu enggau opalan tu (20 nya tukang nyimpan data ke Standard Chartered, NASOM enggau IKBN) lalu 20 iku agi ba industri hospitaliti, alai nembiak autisma belajar bakani ku sida iya nusun kerusi mija, ngemas bilik sereta pengawa bukai.

“Nya alai, ba penemu aku, sigi patut Perintah ngaga mayuh agi palan vokasional kena ngelatih bala nembiak autisma,” ku iya.

Apai indai baka, Faizul Khalid (ke dikelala enggau nama Zulkar) enggau bini iya, Nor Akhmar Fazillah, anak tuai sida iya, Zulkharnain Faizul, 8 taun bisi dua bansa penanggul, iya nya autisma enggau ‘Hyperactive’.

Ku Zulkar, anak lelaki iya nurun terapi ba KAA ninting hari udah iya abis kelas ba Sekolah Tan Sri Sulaiman Daud, lalu Zulkharnain ukai semina nurun sekula ke normal, nurun terapi tang iya mega landik bemain piano.

“Enda muntang nyaga iya, gamal peda normal tang iya kelalu regas (hyperactive), tang diatu laban iya suah dipatih, nyau nemu ngatika diri. Suba iya enda bansa nya, iya selau ngeransi, lalu enti bejaku enggau iya pan, iya enda malik ngagai mua tauka mata nuan.

“Nya alai, berat ba pengajar sereta apai indai baka kami bejuraika pemansang anak autisma kami dalam kelas, lalu tiap pekara ke dipelajar iya dalam kelas enda tau enda sebaka baka ke di rumah,” ku Faizul.

Ke Shareena Salleh, siku indai ke bisi empat iku anak (anak iya ke biak, Siti Aesyah Helmi beumur 13 taun siku nembiak autisma)nemu Siti Aesyah bisi autsima lebuh anak biak iya berumur 2 taun.

“Maya nya jam ke pengabis pedis ba aku, laban maya iya agi mit bansa nya, iya enggai nusu, sereta enggai makai. Enti disuap pan, iya semina bemain enggau utai pakai iya ba dilah aja lalu dibuai, tang udah iya majak besai, udah mayuh berubah, ka makai,” ke Shareena.

Taja pia, iya nandu baru bisi mega maya Siti Aesyah rinduka ngemediska diri nengah chara iya ngentakka pala iya ba dinding tauka ba atas semin tauka malu diri empu.

“Utai bansa tu ka ngemediska diri empu, siti pekara ke normal ba nembiak autisma laban semina nengah chara bansa tu aja sida iya ulih madahka asai ati sida iya (nengah chara ke pedis bansa tu), taja pan enda selalu, kami ke nyaga iya sigi seruran bejaga laban bisi maya iya ngemediska diri empu.

“Gamal sida baka ke enda ka negmediska diri tang nya meh, bepanggai ba perasa ati sida iya empu,” ku Shareena ti mega nyadi indai tunggal.

Ngibun anak biak ke autsima ku iya, siti peneleba ke (challenging) laban dalam pengelama tu ke udah ari umur anak iya 2 taun udah austisma datai ke diatu, manggai 13 taun, anak iya lalu bedau nemu ngintu diri empu.