Pengawa nyukat tanah NCR dilanggur nitihka model ti dikena komuniti Bidayuh
Komuniti Bidayuh di Bau nyukat tanah NCR nengah kerejasama DBNA enggau JTS
BETONG: Kepala Menteri Datuk Patinggi Abang Johari Tun Openg ngelanggur pengawa nyukat tanah Adat Bansa Asal (NCR) ari baruh Seksyen 18 Kanun Tanah Nengeri ba kandang menua tu digaga nitihka model ti diguna komuniti Bidayuh di Bau.
Residen dipelaba ulih numbuhka Komiti Raban Pengereja Pengawa lalu kami ulih nyukat baka ke udah dipejalaika di Bau laban nya jampat agi.
Nitihka Abang Johari, komuniti Bidayuh di Bau nyukat tanah NCR sida ari baruh Seksyen 18 Kanun Tanah Nengeri nengah Serakup Bansa Dayak Bidayuh (DBNA) enggau kerejasama Opis Tanah enggau Survei (JTS).
“Aku deka minta Direktor JTS berunding enggau kita ditu lalu sama bela baum sentang pengawa nyukat tanah tu.
“Residen dipelaba ulih numbuhka Komiti Raban Pengereja Pengawa lalu kami ulih nyukat baka ke udah dipejalaika di Bau laban nya jampat agi,” ku iya.
Iya madah munyi nya lebuh nyaut tanya ari siku ketuai komuniti maya Sesi Townhall ‘Berambeh Ngan CM Abang Jo’ di Dewan Stephen Kalong Ningkan ditu kemari.
Pengawa nyukat tanah ari baruh Seksyen 18 Kanun Tanah Nengeri nya dikena ngeluarka surat pala tanah ungkup lot individu.
Dikena ngenyampatka pengawa nyukat tanah, perintah ku iya nambah 464 juruukur ti deka dianjung ngagai Betong.
Sentang penanggul ari sukut perengka pengangkut di Betong, Abang Johari madah perintah nengeri sedia nyendiaka sebuah bas baru ti ulih ngundan 20 iku orang tambang.
Taja pia ku iya, meri bas nya bepanggai ba pemendar ari Politeknik nya empu laban pekara bekaul pelajar nya ari baruh bidang kuasa perintah besai.
Kelimpah ari penanggul perengka pengangkut, bisi mega dibantai penanggul palan alai diau ungkup nembiak Politeknik Betong ari Raban B40.
Penanggul tu ku Abang Johari deka diperundingka begulai enggau Sapit Kepala Menteri, Datuk Amar
Douglas Uggah Embas.
“Sentang palan endur diau ungkup Politeknik nya ari baruh perintah Pakatan Harapan (PH).
“Nyadi, kami ba renggat perintah nengeri bisi penanggul deka mantu taja kami nadai penanggul ngereja nya.
“Nya alai, perundingka dulu enggau sida opis ti ngatur pengawa nya lalu enti sida ngemendarka perintah nengeri mantu, kami ulih nulung,” ku iya.