Elawin Khas kelai perintah ngenang tanggungpengawa raban JBPM: Alan
MIRI: Elawin Khas RM200 ungkup 14,400 iku raban Opis Bomba enggau Penyah Penusah Malaysia (JBPM) deka dibayar bulan Januari tu ila mandangka perintah meri basa ba tanggungpengawa ti udah dipejalaika sida.
Ahli Dewan Negara Senator Alan Ling madah, raban bomba ukai semina bejalaika tanggungpengawa madamka api tang mega meri servis ke bukai ti diguna mensia mayuh.
“Tebal agi tanggungpengawa enggau pengeransing raban bomba enda ulih dikira dalam meri servis ngagai mensia mayuh, ketegal nya perintah nengah Bajet 2020 meri perais ngagai sida enggau meri elawin RM200 ti deka dibayar bulan Januari taun baru tu ila,” ku iya madah ngagai Utusan Borneo kemari.
Elawin nya ku Alan Ling meri peransang ngagai sida terus bejalaika servis ngagai rayat dalam mayuh macham misyen, servis pengasih, ba pengawa penusah ngenyit sereta penusah bebadi ba jalai alun.
Berebak enggau nya, bantu tu mega abis nadai ulih ngurangka ungkus belanja pengidup ti majak niki diatu.
“Peminta sida ti digaga ari taun 2015 suba udah nerima timbal ti positif ari perintah besai lalu pekara nya deka dipejalaika kena taun 2020,” ku iya nerang.
Nitihka Alan Ling, pangku pengawa raban bomba kelebih agi di Miri endang diterima manah kelebih agi maya napi penusah ngenyit baka musim kemarau, ampuh bah enggau ke bukai.
“Ambika chunto, sida gawa ari pagi nyentuk tengah malam madamka api maya penusah angus babas nyadi di Miri, pia mega nentuka tikas bacha Indeks Pengamah Angin (IPU) enda majak niki,” ku iya.
Alan Ling ke mega Sekretari Pakatan Harapan (PH) Sarawak andal ba penau raban bomba bejalaika pengawa napi sebarang penusah ngenyit ti nyadi kelebih agi di Miri.