Isu ‘beam girder’ ti tumbang dipelaba nyadi ketegal pengilap mensia
MIRI: Menteri Pengatur Pengereja Pengawa, M Kula Segaran enda ngenggaika isu lima unit ‘beam girder’ ti tumbang dipelaba nyadi ketegal pengilap mensia ba projek Pan Borneo di Pakej Kereja 11 (WPC11) Seksyen Pujut, runtuh pukul 2.40 ngalih hari, kena Hari Lima tu tadi.
Taja pia, iya madah pansik ti silik deka dipansik ari semua sukut ti dipejalaika raban Forensik ari Kuala Lumpur ke udah dianjung ba tuju nya.
“Pagila (Hari Satu) seraban Forensik deka datai ditu mansik enggau silik kebuah pekara nya nyadi lalu pansik nya disadang tembu dipejalaika dalam timpuh tiga bulan,” ku iya maya nemuai seraya kereja ngagai palan ke nyadi nya kemari.
M Kula Segaran dipadahka kunteriktor maya kes nya nyadi, nadai komunikasyen entara orang ti megai kren enggau pekereja ba palan nya tang pansik deka dipejalaika ari semua sukut nyengkaum penanggul teknikal.
“Kami nganti ari pansik penuh ti dipejalaika sekalika nya ketegal pengilap mensia, pengilap teknikal, injiniring enggau ke bukai, udahnya baru atur ke patut dipejalaika,” ku iya nerang.
Iya ngemetulka penerang sentang isu nya ukai ngaul semua jematan ke digaga tang semina lima beam girder aja.
“Utai ti pemadu beguna iya nya kitai patut belajar ari pekara ke nyadi nya ngambika enda agi nyadi laban nya projek besai ti beungkus juta ringgit lalu kami enggai timpuh ngaga projek tu dilanjar,” ku iya.
Ku iya, seraban pemesai pengawa pansik ari Opis Pengelikun enggau Pengerai Pengereja Pengawa (JKKP) Sarawak mega udah dulu bejalaika pansik nya.
Tuju tu dikena nentuka kebuah pekara nya nyadi lalu bisi ke enda ngelanggar atur undang-undang ari baruh Akta Pengelikun enggau Pengerai Pekereja 1994 tauka ari baruh Akta Kilang enggau Injinir 1967.
Pansik keterubah tetemuka pekara nya nyadi maya proses ngikat Beam Grirder benung digaga.
Pia mega, sentang pekara nya ngambika ulih bejalaika pansik ke silik agi, JKKP udah ngeluarka surat tangkan ungkup aktiviti bekaul ngangkat enggau ngikat Beam Girder ba palan nya.
M Kula Segaran madah
JKKP diatu dalam proses deka ngatur undang-undang ke komprehensif agi dikena mutarka isu pengelikun enggau pengerai pengereja pengawa dalam sektor ngaga begunan iya nya ‘Occupational Safety and Health (Construction Work Design and Management) Regulation’.
“Undang-undang tu dipelaba deka diteritka ba suku keterubah taun 2020. Dalam pengawa neritka undang-undang nya, perintah udah ngatur sesi ngaul sereta ngatur enggau semua penanam puku dalam sektor ngaga begunan,” ku iya.
Nitihka rikod JKKP ungkup taun 2015 nyentuk ngagai 2018, pukul rata sepenyampau 4,000 kes penusah bebadi nyadi dalam sektor ngaga begunan enggau tikas penusah bebadi ti nabanka nyawa pemadu tinggi bisi dirikod iya nya 13.4 ba tetiap 100,000 iku pengereja pengawa.
“Rikod penyampau tu tiga kali lipat lebih tinggi ari pukul rata tikas penusah bebadi nabanka nyawa menua ba taun 2018 iya nya 4.14 ba tetiap 100,000 pengereja pengawa.
Nengah aktiviti neritka undang-undang dalam sektor ngaga begunan ungkup timpuh bulan Januari ngagai November 2019, sepenyampau 123 iti kes bekaul pekara tu udah dipejalaika lalu 1109 diberi kompaun udah diputarka ti mungkur semua penalti urung RM3.7 juta. Kelimpah ari nya, bisi 4,244 surat tangkan nagang mega udah dikeluarka,” ku iya.
Sama bisi datai ba palan tu iya nya Ahli Dewan Negara, Senator Alan Ling, Kaban Kunsil Nengeri (ADUN) Pujut, Dr Ting Tiong Choon engagu Direktor Gred Besai C Ba Pengelikun Petroleum JKKP Malaysia, Mohd Anuar Embi.