Produk inovasyen ari UNIMAS mujur bulih midul emas ba SIIF 2019 di Seoul
KUCHING: Produk inovasyen ari Sarawak iya nya ‘Design and Development of Smart Knock-Down Fish Farming’ digaga Universiti Malaysia Sarawak (UNIMAS) mujur bulih midul emas sereta bulih gelar khas ba Pekit Seoul International Invention Fair (SIIF) 2019 ti diatur di Seoul, Korea Selatan bedau lama udah.
Produk nya siti ari asil digaga Felo Pemansik Institut Seni Kreatif enggau Teknologi sereta Pengelicha Kanan Fakulti Seni Gunaan enggau Kreatif, UNIMAS, Profesor Madya Dr. Saiful Bahari Mohd Yusoff.
Produk nya mayuh mantu UNIMAS nengah ngelakuka produk sereta udah ditukuka enggau Anugerah Midul Emas enggau Anugerah Pemadu Tinggi iya nya ‘Best of The Best’ ba Persidangan dan Ekspo Ciptaan Institusi Pengajian Tinggi Antrabangsa (PECIPTA) 2019 kena ke bulan Oktober tu tadi.
Bisi 627 produk digaga ari 27 bengkah menua sama nyereta pekit SIIF ti mungkur produk ari mayuh bengkah universiti, industri sereta ejensi pemansik.
Ku Dr. Saiful, produk ti digaga iya nya asil pansik pengawa betanam betupi sereta akuakultur kelebih agi dalam konteks pemansang sosio ekonomi komuniti B40.
“Tu seriris enggau Juluk Pemansang ti Meruan ke dipejalaika Persatuan Bangsa-Bangsa Bersatu.
“Produk Smart KnockDown Fish Farming tu ulih mantu raban B40 nyungkak penatai pemisi sida nengah pengawa nupi ikan sekalika ikan sungai tauka tasik,” ku iya.
Produk tu ku iya, bebida enggau chara produk sangkar ikan bejarin ti endang udah bisi diatu.
“Produk tu iya nya produk ti tegap ari jelu ti ulih makai ikan baka menarat, jagu, ringin sereta jelu ke bukai.
“Produk tu mudah instalasyen, logistik sereta engkeman diengkah ba sebarang kandang endur kelebih agi ba kandang menua pesisir dikena mantu peranak ba kandang menua nya nyungkak penatai pemisi sida,” ku iya.
Naka ke diatu, ku Dr. Saiful, produk tu benung chakah dikemansangka ba Kandang Menua Ulu Danum Murum dikena mantu komuniti Kenyah sereta Penan ba kandang menua nya.