Opis Bomba Sarikei seruran matau tikas peninggi ai
SARIKEI: Berindik ari gaya hari ti ujan sereta ai pasang penuh kenyau Hari Tiga tu tadi, raban bomba ari Opis Bomba enggau Penyah Penusah Sarikei terus bejalaika pengawa matau kelebih agi ba kandang endur ti ditemu ulih kena tasah ampuh bah.
Ketuai Balai Bomba enggau Penyelamat Sarikei, Mahmudin Narudin madah, pengawa tu beguna bendar dalam nentuka peranak ti diau ba kandang endur baruh lalu dipelaba tau ampuh bah ulih diselamatka enggau lengkas nyema gaya nya balat nyadi.
“Opis kami udah nganjung raban bomba ke bejalaika tanggungpengawa matau tikas ai niki belama kelebih agi maya hari ujan balat enggau ai pasang.
“Naka diatu, gaya ai agi likun lalu ai pasang enggau gaya hari ujan agi ba tikas ti likun.
“Bepelasarka asil pengawa matau ti dipejalaika kami naka ke diatu, kelebih agi kilah lemai, iya nya urung pukul 6 ngagai 9 malam, maya ai pasang nyadi, tikas ai agi ba tikas ke likun kelebih agi ba kandang endur ke baruh,” ku iya ensanus.
Entara kandang menua ti diberi perati enggau fokus endur bejalaika pengawa matau ari raban bomba iya nya ngelingi Tebing Sungai Nyelong enggau Tebing
Sungai Rajang.
Berebak enggau nya mega, Mahmudin ngelalau mensia mayuh ti diau ba kandang endur baruh ti dipelaba napi ampuh bah, dilalau seruran bejejaga.
“Pengawa tu beguna amat dalam nentuka pengelikun sida.
“Pia mega, kitai ngarap sida ulih nyimpan semua dokumen ke beguna ba endur ke likun lalu lengkas betelefon ngagai bomba nyema napi penusah ngenyit bisi nyadi,” ku Mahmudin agi.
DURIN: Program Ngelai Lalu Bejadika Pengawa Ngemesaika Jematan Durin tauka Jematan Batang Rajang, semanjai 1.2 km udah mujur diatur pagi kemari.
Program kelai nya dipenyadika Menteri Kereja Raya Baru Bian.
Pengawa ti nyambung ‘gidder’ ke penudi kemari, nyadika kelai kereja ngaga jematan nya udah tembu digaga.
Jematan nya dipelabaka tau berengkah ditengah tauka dikena mensia mayuh kena bulan April 2020 ila, 2 bulan tumu agi ari timpuh jematan nya ke udah diperambu tembu ngelamatu.
Berebak enggau nya, Jematan Durin entara siti skop kereja Kontrak Pakej Kereja (WPC 07) Simpang Bintangor ngagai Jematan Sungai Kua ari projek Pan Borneo Sarawak, pia mega projek tu dipejalai sereta diatur Hock
Seng Lee -Dhaya Maju Infrastructure Asia JV.
Skop kereja ngaga lalu ngemesaika jematan tu iya nya empat iti lorong jalai alun, lalu dua iti lorong ari nya jalai Pasar Sibu-Durin ti ngelayang Sungai Batang Rajang.
Nengah projek tu, rayat ba Sarawak deka ngasaika penyenang enggau pengelikun lebuh ti nengah jalai alun, pia mega meri awak dikena nambahka orang ti landik ba pengawa kereja raya.
Kelimpah ari nya, projek tu nyadika pelasar ngagai Sarawak Corridor of Renewable Energy (SCORE) sereta pemansang pelilih menua ti bepotensi tinggi, kelebih agi palan menua ti ulih mai enggau nyungkak penatai pemisi kandang nengeri tu.