ACS Sibu mujur ngatur program Bejalai Bebala Mayuh Hari Krismas 2019
SIBU: Gerempung Gerija Sarawak (ACS) Sitak Sibu udah mujur ngatur program Bejalai Bebala Mayuh Nyerumba Hari Krismas (PKTS) 2019, ti bepalan ba Dataran Tun Tuanku Bujang Fasa 1, kilah lemai ensanus.
Urung 8,000 iku orang ti bepengarap Kristian ari kandang menua tu bisi enggau ngulu program nya, ti diketuaika sereta diatur pampang Gerija Methodist, taun tu.
Sida ti nyereta program tu begempuru beranti ba Dataran Tun Tuanku Bujang kenyau ari pukul 5pm lalu pengawa bejadika program belabuh diatur urung pukul 6 lemai, pia mega baka taun tu sida berambaika jaku ‘God
So Loves The World’.
Entara bala raban pemesai ti bisi ngulu program tu iya nya Residen Pelilih Menua Sibu Charles Siaw enggau Sekeretari Politik Kepala
Menteri Micheal Ting.
Kelimpah ari program bejalai bebala mayuh, ba program PKTS 2019 tu mega bisi diatur pengawa belagu lagu puji enggau Krismas ti diuluka raban Gerija Methodist Masland, lalu sembiang pemuka program diketuaika
Presiden ‘Persidangan Tahunan Methodist Sarawak Iban’ (SIAC) Reverend Steward Damat.
Berebak enggau nya, Reverand Thomas Lau Sie Ngiu ngenataika pesan Krismas lalu macha injil diuluka Chairman ACS Sitak Sibu Reverend Monsignor Michael Lee Hock Chai.
Berindik ari nya mega, pengawa ke tanda bejadika program tu iya nya nungkun dian ti diketuai sereta dipenyadika raban komiti ari semua pampang gerija ba kandang menua tu, begulai enggau Siaw seduai Tiang.
Program PKTS tu nerima sukung ti chukup manah sereta mantaika penyerakup ati semua raban Kristian ba sitak menua tu, beserimbai enggau nyambut Hari Krismas sepengelama 10 hari agi, ti deka datai.