Padang bilun Spaoh deka tembu digaga dalam timpuh lima taun

Padang bilun tu logistik ti dikena ungkup produk ladang baru ngambika jampat agi dijual

BETONG: Padang bilun Spaoh di Bebuling dipelaba tembu digaga dalam timpuh lima taun berengkah ari diatu.

Kepala Menteri, Datuk Patinggi Abang Johari Tun Openg madahka Opis Penerebai Mensia Mayuh begunaka timpuh nyendiaka diri beoperasyen kelimpah timpuh ngaga padang bilun nya.

“Sri Aman, Betong enggau sebagi ari Sarikei bisi potensial besai ba pengawa betanam betupi lalu ngaga kandang menua nya nyadi ‘Food Basket’.

“Padang bilun tu logistik ti dikena ungkup produk ladang baru ngambika jampat agi dijual.

“Tang kitai enda tau enda ngena chara betanam betupi moden baka sistem fertigasyen enggau ‘Internet of Things’ (IoT),” ku iya maya Sesi Town Hall ba Dewan Stephen Kalong Ningkan ditu, kena Hari Minggu nyin tadi.

Sama bisi datai, Sapit Kepala Menteri Datuk Amar Douglas Uggah Embas,

“Sri Aman, Betong enggau sebagi ari Sarikei bisi potensial besai ba pengawa betanam betupi lalu ngaga kandang menua nya nyadi ‘Food Basket’. ”

Datuk Patinggi Abang Johari Tun Openg Kepala Menteri

Menteri Muda Nembiak, Lumba enggau Main, Datuk Snowdan Lawan, Kaban Parlimen Betong, Datuk Robert Lawson Chuat enggau Kaban Kunsil Nengeri Layar, Gerald Rentap Jabu.

Ungkus ngaga padang bilun tu iya nya RM108 juta ti bisi alai bilun sangkai enggau beleka ti pandak lalu digaga perintah nengeri tu.

Berebak enggau nya, Uggah meri terima kasih ngagai Abang Johari laban udah ngungkupka RM20 juta dikena mantu orang berikan meli perengka baru.

Ungkup belanja tu ku iya, penambah ngagai bantu ari perintah besai dikena nyaup komuniti norang berikan maya musim tengkujuh.

Uggah mega meri terima kasih ngagai kepala menteri laban udah ngemendarka RM5.2 juta dikena ngaga palan inovasyen ba siti endur ke baru ditu.

Sentang konsep betanam betupi moden, Uggah madahka bisi dua model ladang fertigasyen di Simpang Layar enggau di SMK Spaoh.

“Kitai diatu nganti pemutus perintah nengeri sentang pengawa numbuhka Taman Agro di Debak.

“Laban mayuh projek ti deka digaga dudi tu, aku ngarap rayat majak beserakup lalu meri sukung penuh ngagai perintah nengeri,” ku Uggah.

— Gambar Opis Menteri Betanam Betupi Moden, Tanah Adat enggau Pemansang Kandang Menua TERIMA KASIH: (Ari kiba) Temenggong Richard Mulok, Temenggong Piee Alwi enggau Pemancha Kueh Tu Teck nyuaka tepa ngagai Abang Johari (kanan). Sama bisi dipeda dia, Uggah (dua kanan).