Pekara silik bekaul minyak enggau gis nadai dikerandau dalam Komiti Pemandu MA63
KUCHING: Opis Kepala Menteri nyemetak madahka perambu Sarawak ti deka meli saham dalam Petronas ukai antara isu ti dikerandau enggau silik dalam Komiti Pemandu Sempekat Malaysia 1963 (MA63).
Ku Opis Kepala Menteri pekara silik bekaul minyak enggau gis semina dikerandau kediri antara Menteri Besai Tun Dr Mahathir Mohamad enggau kepala Menteri Sarawak (Datuk Patinggi Abang Johari Tun Openg) sereta Kepala Menteri Sabah (Datuk Seri Mohd Shafie Apdal).
Ku Opis Kepala Menteri, penerang Sapit Menteri Dagang Dalam Nengeri Enggau Pekara Penguna,
Chong Chieng Jen enda nemu silik penerang bekaul enggau isu saham minyak enggau gis sereta nadai kuasa mantaika sebarang pemadah bekaul enggau randau nya, enti nyema bisi.
“Kelimpah ari nya, patut diingat mega pengawa meli saham dalam anak kompeni Petronas enda tau disemaka enggau pengawa meli sekalika bisi kaul enggau saham kompeni besai Petronas.
“Sarawak bisi saham dalam anak Kompeni Petronas baka LNG ke mega kaban ekuiti dalam SMDS. Nynetuk ke sehari tu, nadai peminta deka meli saham Petronas ngagai Sarawak,” ku penerang nya.
Kena Hari Minggu nyin tadi, Chong ke mega Chairman Pakatan Harapan (PH) Sarawak nengah penerang media madahka bala ketuai Gabungan Parti Sarawak (GPS) enda patu nguji bemain politik bekaul enggau ekuiti dalam Petronas.
“Penemu Sarawak bisi kaul dalam ekuiti Petronas udah dibantaika dalam Komiti Pemandu MA63 lalu Kepala Menteri Datuk Patinggi Abang Johari ti bisi ngulu aum nya nadai madahka iya mantah perambu nya.
“Semua ke dalam Komiti Pemandu nemu pasal perambu nya,” ku iya nengah penerang media kena Hari Minggu nyin tadi.
Ku Chong, komiti nya mega nentuka penyilik kaul enggau ekuiti Sarawak dalam Petronas ti deka dikerandau antara Menteri Besai Tun Dr Mahathir Mohamad enggau kededua kepala menteri Sabah enggau Sarawak.
Nya alai ku iya, nadai pematut sekeda ketuai GPS madahka diri enda nemu sentang pinta nya.
Ke bendar ku Chong, pemisi ekuiti Sarawak ba ngeluarka minyak enggau gis berengkah enggau sekeda loji Gis Asal Lela (LNG), Perintah Sarawak megai lima peratus (5%) saham dalam Malaysia LNG Sdn Bhd, 10 peratus saham dalam Malaysia LNG Dua Sdn Bhd enggau Malaysia LNG Tiga Sdn Bhd.