Kalender Program 2020 udah dipenyadi kemari
SIBU: Opis Menteri Dagang Temuai enggau Main Asal Sarawak kemari udah mujur bejadika Kalender Program 2020 ti mandangka 94 iti program enggau pengerami ke bisi di serata Sarawak,dikena ngelakuka dagang temuai di nengeri tu.
Pengawa nya udah dipenyadi Menteri Muda Dagang Temuai enggau Main Asal Sarawak Datuk Sebastian Ting, ba Aum Komiti Perambu Dagang Temuai Sarawak Bil. 2/2019, ti bepalan ba sebuah hotel di Sibu.
Bisi 95 iti program dalam Kalender 2020 tu iya nya ari 12 bagi menua dalam Sarawak baka Kuching sepenyampau 31 program, Samarahan (3), Serian (4), Sri Aman (4), Betong (1), Sarikei (3), Sibu (9), Mukah (12), Bintulu (9), Kapit (3), Miri (9) enggau Limbang (7).
“Kami ari Opis Menteri Dagang Temuai deka majak bekerejasama enggau ejensi perintah, industri dagang temuai sereta peranak ba kandang menua tu, ngambika ulih ngerintai lalu nusun mayuh agi bengkah program dagang temuai ti beguna ungkup taun 2020 ila.
“Kelimpah ari nya, aku mega meri terima kasih ngagai semua raban ejensi perintah laban ti udah bekerejasama sereta bebendar ba pengawa ngatur Kalendar
Program 2020 tu,” ku iya bejaku ba aum nya.
Ku iya, entara program enggau pengerami ti amat beguna ba taun 2020 ila iya nya ‘Festival Muzik Hutan Hujan Dunia’, ‘Festival Muzik Jazz Borneo’, ‘Festival Tidal Bore’, ‘Pesta Babulang’, ‘Pesta Kaul’, ‘Lumba Perau Naga Sarawak Renggat Antarabansa’, ‘Festival
Layang-Layang Sarawak’, ‘Festival Kebudayaan Sarawak’ enggau ‘Regata Sarawak’.
Kaban Kunsil Nengeri (ADUN) Piasau nya mega madah,Perintah Sarawak udah berengkah ngepunka Pelin Besai Dagang Temuai Ke-3 (2020-2035), dikena ngemujurka Sarawak nyadi palan ke dikerinduka temuai ba taun ti deka datai.
Kelimpah ari nya, ‘Akta Satelit Pelancongan’ (TSA) ke pemadu baru dipenyadika kena 10 Disember empai lama, deka nyadika pun penatai pemisi ke beguna sereta engkeman enggau maya iya, ti nyadi pelin besai ti komprehensi.
“Sarawak majak bekerejasama enggau Opis Ngitung Penyampau Tubuh Malaysia ngambika TSA semampai diatur belama.
“Ari atur ti entap, perintah nengeri Sarawak enggau pemain industri dagang temuai ulih ngena TSA dikena mantai sereta meda asil enggau perambu strategik ba pengawa ngemansangka industri dagang temuai nengeri tu,” ku iya.
Pengawa nya mega bisi digulu Sekretari Mendam Opis Menteri Dagang Temuai enggau Main Asal Hii Chang Kee, Ketuai Pemesai Eksekutif Opis Dagang Temuai Sarawak (STB) Sharzede Datu Salleh Askor enggau bala ke bukai.