KKWKP fokus negapka institusyen ruang bilik komuniti di Sarawak, ku Fatimah
KKWP dekaka rayat idup dalam pengelantang, likun enggau ngurangka kes sarak
KUCHING: Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKWKP) fokus negapka institusyen ruang bilik enggau juluk komuniti ti idup lantang di Sarawak.
Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madah, nya entara siti ari tuju opis menteri nya deka nentuka rayat kandang nengeri tu ulih idup dalam pengelantang sereta likun.
“Enti kitai meda kes sarak di Sarawak ti mungkur tiga bansa tikah iya nya syariah, sivil enggau adat. Nitihka statistik ke diambi ari Kort Syariah Sarawak, bisi 2,172 kes sarak orang pengarap Islam di nengeri tu dirikod ba taun 2016.
“Ba taun 2017, bisi 2,054 kes sarak dirikod lalu penyampau tu niki ngagai 2,761 ba taun 2018,” ku iya bejaku ba Pengerami Makai Lemai Alumni, Family Warrior di sebuah hotel ditu, kena malam Hari Minggu.
Sentang kes sarak ti direjista Opis Pengerejista Menua
Ba taun 2017, bisi 2,054 kes sarak dirikod lalu penyampau tu nambah ngagai 2,761 ba taun 2018.
Dato Sri Fatimah Abdullah
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit
(JPN) ari baruh tikah sivil, Fatimah madah, sepenyampau 1,194 kes dirikod di Sarawak kena taun 2016.
“Penyampau tu mandangka kes nambah ari taun 2016 ngagai 2017 iya nya sepenyampau 1,303 kes tang nurun ngagai 1,107 kes sarak kena taun 2018.
“Bepelasarka rikod statistik sarak nitihka adat ke direjista, bisi 1,231 kes sarak di nengeri tu dirikod ba taun 2016 lalu 2017 kes nya nambah ngagai 1,269 kes,” ku iya.
Tang ba taun tu tadi ku iya, penyampau nya nurun iya nya 1,139 kes sarak nitihka adat ke bisi dirikod.
“Ari statistik sarak di nengeri tu, nya mih kebuah kitai fokus negapka institusyen ruang bilik enggau Opis Orang Indu enggau Ruang Bilik Sarawak (JWKS) udah diberi pengawa bejalaika program ti ulih ngurangka kes sarak. Utai ti deka kitai iya nya meda mayuh agi ruang bilik ti idup lantang,” ku iya.
Nitihka Fatimah, entara batang kebuah laki bini tau sarak iya nya enda sepenemu enggau ketegal ari penanggul duit.
“Kelimpah ari nya, isu gian dadah, kes nyamah bini, orang ketiga enggau enggai bepoligami mega ditemu entara kebuah pekara tu ngeruga pengelantang ruang bilik ti ngujungka sarak,” ku iya.
Berebak enggau nya, iya meri terima kasih ngagai JWKS ba atas inisiatif ngatur pengerami ngintu bala pesereta ti ngambi bagi ba ‘Program Baitul Muslim: Islamic Parenting Skills enggau Till Jannah: Smart Marriage’ berengkah ari renggat keterubah diatur kena 2017.
Nyentuk diatu, ku iya, bisi 17 renggat program nya diatur di selampur nengeri tu ti mungkur sepenyampau 4,300 iku pesereta.
“Insya-Allah, taun baru ila kami ngatur kus tu agi nyadika chara nyeliahka kes sarak ba komuniti ari majak nambah.
“Dikearap pengawa ti dipejalaika tu ulih nyapai juluk dikena nentuka institusyen ruang bilik kelebih agi ba jalai pengarap Islam idup dalam pengelantang lalu ngangkatka ruang bilik ti penuh pengaga di Sarawak,” ku iya agi.