Bejejaga, kemeratka pengelikun maya bejalaika pengawa ba tasik

KUCHING: Komuniti maritim dilalau bejejaga lalu ngemeratka pengelikun maya bejalaika pengawa ba tasik berindik ari ribut ti balat dipelaba nyadi ba kandang tebing tasik Sarawak.

Laksamana Pertama Maritim Sarawak Robert Tek Geok Chuan madah, komuniti maritim kelebih agi di Sarawak patut beratika sentang gaya hari diatu enti deka bejalaika sebarang aktiviti ba tasik.

Nitih ku iya, komuniti maritim kelebih agi orang berikan bot mit, bot mai temuai patut ngemeratka pengelikun may aba tasik dikena nentuka pengelikun nyawa sereta reta sida likun lalu nadai pekara ke enda disadang nyadi.

“Opis Ngemata Gaya Hari Malaysia udah ngeluarka surat tangkan gaya angin balat nyadi ari timur tasik pengelaju angin 40-50 kmsj enggau umbak ulih tinggi nyentuk ke 3.5 meter dipelaba nyadi ba kandang tebing tasik Sarawak.

“Gaya angin ti balat enggau umbak tasik tu enda likun ngagai bot mit, palan ngelantangka ati tasik sereta aktiviti lumba engggau main tasik,” ku iya nengah siti penerang media kemari.

Berebak enggau nya, ku iya Maritim Malaysia minta kerejasama ari semua bot dagang temuai, bot mai orang enggau bot orang berikan sama bela ngangkatka tikas pengelikun ba tasik.

Iya mega ngelalau orang dagang palan rekreasyen ba kandang endur pulau ngetuka enda lama aktiviti ngelantangka ati sereta aktiviti lumba enggau main ba tasik sementara nganti gaya hari manah baru.

Aku ngansak mensia mayuh ngambika terus ngeripot ngagai Palan Operasyen Maritim Malaysia Nengeri Sarawak enti bisi sebarang penusah ngenyit nyadi tauka pekara ke enda disadang bisi nyadi ba tasik tau betelefon ba lumur 082-432544 tauka 999 ti seruran beoperasyen 24 jam,” ku iya.