Nanta, Jamit udah nemuai seraya kereja ngagai Rumah Empawi di Ulu Sungai Yong
KUCHING: Rayat pupu bansa enda ngira penatai enggau kuing politik ditesau datai ngagai Pengerami Nyambut Pengabang Krismas ti diatur Gempung Gerempung Dagang Temuai Sarawak (STF) kena 21 Disember tu.
Ketuai Pemesai Operasyen STF, Franklin Simon madah, pengerami nyambut pengabang nya dipejalaika berengkah pukul 12 tengahari nyentuk pukul 3 lemai di Kort Lama ditu.
Iya melaba bisi 300 iku temuai deka datai ngagai pengerami nyambut pengabang Krismas nya.
“Baka pengerami nyambut pengabang ke sebedau tu, kami ngatur pengerami tu dikena mai mensia mayuh ari pupu bansa sereta jalai pengarap ngintu pengerami Krismas enggau adat nyambut pengabang di Sarawak ti nyelai ti nadai ditemu ba endur bukai.
“Ketegal nya, kami ngelalu semua pupu bansa enggau jalai pengarap, temuai tauka komuniti ba nengeri tu datai sampal ngasaika pengerichah pengerami Krismas nengah ngabang ngagai kami kena Hari Enam tu,” ku iya.
Iya madah munyi nya ba aum media Pengerami Nyambut Pengabang Krismas STF 2019 ba Kort Lama ditu, kemari.
Franklin nambah, pengerami nyambut pengabang nya deka nyadi siti chunto penyerakup ti bisi di Bumi Kenyalang.
“Kelimpah ngintu pengerami Krismas nya begulai enggau temuai sereta komuniti ditu, pengawa nyambut pengabang Krismas STC mega deka diintu begulai enggau raban ti enda benasit manah.
“Taun tu, kami mai Rumah Seri Kenangan, Rumah Nembiak Mit Toh Puan Hajah Norkiah, Sekula Khas Gerempung Pengelantang Pendiau Nembiak Mit Timpang Pendiau (PERKATA) Kuching enggau Palan Ngatur Dalam Komuniti Kota Samarahan,” ku iya.
Sama bisi diatur ba pengerami nya ila,ku iya, iya nya aktiviti ngias Krismas Gingerbread House enggau Gingerbread Cookie sereta pengawa belagu lagu Krismas
ti betuaika Cathedral St. Thomas Choir sereta penatai Uskup Besai Gerija Anglika Sarawak enggau Brunei Rt. Revd. Datuk Danald Jute.
“Mayuh macham bansa pemakai menua tu baka Bubur Asyura, Mee Kolok, chapi panggang, ais kacang Swee Kang, Laksa Sarawak, Satay, Manuk Pansuh, Poori enggau kuih deka dinah,” ku iya.
Pengerami nya siti ari kimpin Nyambut Pengabang Sarawak ari STF nengah kerejasama Opis Menteri Dagang Temuai, Seni enggau Main Asal Sarawak, Opis Dagang Temuai Sarawak, Muzium Brooke, Food Journal, Guan Ho Leong Sdn.Bhd enggau Kuching In and Out (KINO) Magazine.
KAPIT: Kaban Parlimen Kapit Datuk Alexander Nanta Linggi enggau Kaban Kunsil Nengeri Bukit Goram Jefferson Jamit Unyat semanjai ujung minggu udah nemuai seraya kereja ngagai Rumah Empawi Anak Sawa, semak Ulu Sungai Yong, Jalai Ulu Sungai Yong ditu.
Tuju penemuai sida iya nya meresa projek jalai simen beungkus RM200,000.00 ti udah tembu digaga bedau lama udah ari simpang Jalai Ulu Sungai Yong ngagai rumah panjai. Kilah lemai, seduai ngulu pengawa sesi dialog ‘Ketuai enggau Rayat’ ke diatur ba ruai Rumah Empawi ti digulu peranak rumah panjai semanjai Sungai Ulu Yong.
Lebuh dikerandau, Jamit nerang jalai simen nya dipejalaika ari baruh agih belanja Projek Transformasyen Menua Pesisir (RTP). Iya mega madah, jalai besemin nya patut diangkatka sereta dikemanah ngambika ulih nyendiaka jalai ti manah agi. Iya madah, peranak Rumah Empawi endang patut bulih jalai nya laban sida bisi perengka pengangkut lalu mayuh ari sida gawa ngagai Kapit.
“Diatu, Kaban Parlimen Kapit Datuk Alexander Nanta Linggi enggau aku empu bela datai ditu laban kami deka meresa projek beungkus RM200,00.00 ti udah tembu bedau lama udah. Jalai tu digaga nengah bantu RTP ari Perintah Sarawak. Aku deka minta peranak ditu ngambika nemu semua projek pemansang nengah belanja ari baruh Perintah Nengeri Sarawak iya nya Gabungan Parti Sarawak (GPS) ti betuaika Kepala Menteri Datuk Patinggi Abang Johari Tun Openg. Fokus kami deka ngenyampatka pemansang infrastruktur enggau perengkaguna ba kandang menua pesisir dikena ngangkatka agi tikas kualiti pengidup rayat kandang menua pesisir,” ku Jamit.
“Kepala Menteri Datuk Patinggi Abang Johari Tun Openg lebuh iya nemuai ngagai Kapit sebedau tu (dua taun ke udah) ngemendarka pengawa ngaga URDA - Opis Bekuasa Pemansang Atas Rajang enggau ngungkupka bajet sepenyampau RM1.5 bilion ba taun 2019 ngagai 2020 ungkup pemansang infrastruktur enggau perengkaguna. Pekara ti dikemerat iya nya jalai ti ngaul kandang menua. Aku amat gaga semua ruamh panjai semanjai jalai besai diatu udah bisi jalai. Ukai semina jalai aja, bekal kuasa elekterik 24 jam ari baruh Bekal Elekterik Kandang Menua Pesisir nengah Grid Nengeri sereta bekal ai beresi. Nangkannya nya, kami mega fokus ba pemansang sosio-ekonomi dikena merambu aktiviti sosio-ekonomi ba tanah puang nyadi aktiviti betanam betupi dikena nyungkak penatai pemisi,” ku Jamit seraya nambah.
Sebedau nutup jaku iya, Jamit meri selamat Hari
Krismas enggau Taun Baru ngagai sida.
Pia mega, bejaku ngarika peranak kandang menua nya, Tuai Rumah Empawi besemaya deka nyukung penuh ngagai Jamit enggau Nanta ti nyadi ketuai politik sida di Kapit.
Iya meri terima kasih ngagai Jamit laban udah ngemendarka peminta sida ti deka bisi jalai besemin nya.
“Selamat datai ngagai rumah panjai aku. Peranak rumah panjai gaga ati enggau kita (Jamit enggau Nanta) laban udah nemu nasit ti ditapi kami, ke guna enggau peminta kami. Nengah nya, kami besemaya deka penuh nyukung nuan (Jamit) maya ba Pengawa Bepilih Nengeri (PRN) ti deka datai ila. Kami endang nyukung Jamit nyadika chalun ngetanka penuduk nya. Kami ditu tetap nyukung milih Jamit. Kami ngarapka iya ulih mai kerusi Bukit Goram ungkup GPS enggau undi majoriti ti besai,” ku Tuai Rumah Empawi.
“Di Kapit, kami bisi tim manah diketuaika Sapit Kepala Menteri Tan Sri Datuk Dr James Jemut Masing, Kaban Parlimen Hulu Rajang Datuk Wilson Ugak Kumbong, ADUN Pelagus Wilson Nyabong Ijang enggau Jamit. Kami andal enggau tanggungpengawa kita ti mai pemansang ngagai kami. Nyadi rayat, kami endang nyukung penuh ngagai nuan,” ku Empawi.
Sama bisi bejaku ba pengawa tu iya nya Nanta.