Kes betenahka Nancy, Joseph Tawie dipinta mayar RM25 ribu
KUCHING: Ex- pengarang berita Joseph Tawie minta ampun ketegal penyalah iya mantaika penerang ti betenahka Kaban Parlimen Batang Sadong Datuk Seri Nancy Shukri ba Korth Tinggi ditu, kemari.
Akim Datuk Supang Lian lalu minta Joseph, 74, mayar pampas RM25,000 ngagai Nancy.
“RM10,000 patut dibayar dulu ngagai plaintif (Nancy) dalam timpuh 30 hari ari timpuh perintah tu dikeluarka,” ku Supang dalam prosiding kort pagi kemari.
Joseph mega diperintahka ngaga peminta minta ampu nengah surat berita The Borneo Post enggau New Sarawak Tribune dalam timpuh tiga hari berengkah ari kemari, kelimpah madamka penerang nya ari Facebook iya.
Iya mega dilalau enda nandu ulah nya.
Penerang nya ditulis Joseph nengah Facebook iya kena bulan Mei 2019.
Penyarut nya nyadi lebuh Nancy bebendar nyangkal jaku tuduh Joseph Tawie ti madahka iya udah ngeluarka perintah ngambika pengerami ngintu malam Gawai Dayak kena 31 Mei taun nyin kemaridi Kampung Sg. Bulu (Buluh) Sadong Jaya, dikinsil.
Nancy madahka jaku tuduh Joseph nya mega baka petenah ngagai iya lalu ba awak ke sama tau nempa pengeringat ba rayat Sarawak kelebih agi ba sitak Parlimen Batang
Sadong.
Jaku tuduh nya mega mandangka Nancy baka ke deka masuk champur ba pemutus Tuai Rumah. Berebak enggau nya, Nancy madahka kes nya udah ngujungka iya enggau Joseph nyadi bakih.
“Joseph Tawi enggau aku nyadi bakih ketegal kes tu.
Aku ulih ngasaika pengelurus ati iya maya iya minta ampun lalu aku udah ngampun iya,” ku iya lebuh dikerandau pengarang berita ba Kort Kuching, sepenembu kes nya.
Ku iya baru, iya pechayaka semua orang taja pan bebida ba jalai pengarap enggau bansa sereta patut diberi peluang nebus pengilap iya.
“Taja pia endang bisi empas ketegal betenah,” ku iya.
Iya mega n gelalau mensia mayuh ngambika anang mudah arapka berita ti bedau temu pengamat.
“Kita patut meresa dulu berita ke diterima.Anang nyadi ‘pak turut’. Nyadi mih individu ke pintar beratika sesebengkah pekara,” ku iya.
Nancy diarika luyar Shankar Ram lalu Joseph diarika luyar,
Augustine Liom.
Sama bisi datai ke kort meri sukung sukung ngagai Nancy iya nya Menteri ba Opis Kepala Menteri (Integriti enggau Ombudsman) Datuk Talib Zulpilip enggau Kaban Parlimen Kota Samarahan, Rubiah Wang.